Naýyrzym qoryǵyndaǵy qyzǵaldaqtardyń gúldeýi ádette erte kóktemde bastalady da, ushy-qıyry joq sheksiz dalany 7-8 túrli boıaýǵa bólep, qubylta qulpyrtyp turady.
Qostanaı oblysynda ósetin Naýyrzym qyzǵaldaqtary osy gúldi kóp zerttegen ósimdiktanýshy ǵalym Aleksandr Shrenktiń esimimen baılanystyrylyp, ǵylymı tilde Shrenk qyzǵaldaǵy dep atalady. О́kinishke qaraı, mamyrmen jarysa qaýlap shyǵatyn qyr qyzǵaldaǵy jyl sanap sırep bara jatqan ósimdikter qatarynan sanalady.
Mamandardyń aıtýynsha, kóktemniń názik gúli túıinshek dán tamyrlary arqyly kóbeıedi eken. Al julynǵan qyzǵaldaqtyń tamyrynda qalǵan dán sabaǵynan ajyrap, qoreksiz qalǵan soń, kóp uzamaı jansyz túıirshikke aınalyp, julynǵan gúldiń ornyna qaıtadan gúl ósip shyqpaıdy.
Qyr gúline qyzyǵýshylar, ásirese, mamyr aıynda kóbeıe túsedi. Tabıǵattyń ásem keıpine, dalanyń jupar ıisine mas bolǵan jolaýshylardyń kóbi kóligin jol ústine qoıa salyp gúl terip ketýge áýes keledi. Alaıda mundaı jolaýshylar joıylyp bara jatqan dala qyzǵaldaǵynyń zańmen qorǵalatynyn eskerýi tıis.
Zań boıynsha qyzǵaldaq julǵan adam qylmysker sanalyp, QR QK 339-baby boıynsha 3000 AEK kóleminde aıyppul arqalaıdy nemese 800 saǵat qoǵamdyq jumysqa tartylady. Tipti, tabıǵat sulýlyǵyna orasan zııan keltirgen azamattardyń dúnıe-múlki tárkilenip, 3 jyldan 5 jylǵa deıin bas bostandyǵynan aıyrylýy múmkin.
Qostanaı oblysy