Ortalyq saılaý komıssııasy ókili respýblıkalyq referendým ótkizý tártibi týraly aıtty, dep habarlaıdy Egemen.kz.
«Respýblıkalyq referendýmǵa daıyndyq pen ony ótkizý tártibi «Respýblıkalyq referendým týraly» 1995 jylǵy 2 qarashadaǵy Konstıtýsııalyq zańda kórsetilgen. Referendýmdy ótkizýge azamattar erikti túrde qatysady ári bul jasyryn daýys berý arqyly jalpyǵa birdeı, teń jáne tikeleı qatysý quqyǵyna negizdeledi», dedi Ortalyq saılaý komıssııasy tóraǵasynyń orynbasary Konstantın Petrov OSK otyrysynda.
Onyń aıtýynsha, ákimdikter daýys berýge arnalǵan ýchaskelerdi anyqtap, referendýmǵa qatysýǵa quqyǵy bar azamattardyń tizimin jasaýy tıis. Referendýmdy ázirleý men ótkizýdi OSK, aýmaqtyq saılaý komıssııalary men ýchaskelik saılaý komıssııalary júzege asyrady. Ortalyq referendým komıssııasynyń qyzmetin OSK atqarady.
«Referendýmnyń quramyn, aýmaqtyq jáne ýchaskelik komıssııalaryn jarııalaý merzimderi, komıssııalardyń ornalasqan jeri men jumys ýaqyty týraly málimetter referendým taǵaıyndalǵannan keıin 10 kúnnen keshiktirilmeı, al naqty aıtqanda, 15 mamyrdan keshiktirilmeı BAQ-ta jarııalanýy tıis. Dál osyndaı merzimde ákimder BAQ-ta referendým ýchaskeleriniń shekaralary týraly aqparattardy jarııalaýy tıis.
Úgit Jarlyq engizilgen sátte bastalyp, 4 maýsymda aıaqtalady.
Respýblıkalyq referendýmǵa qatysýǵa quqyǵy bar azamattardyń tizimderine ákim qol qoıady jáne daýys berý bastalǵanǵa deıin 20 kún buryn, 15 mamyrdan keshiktirmeı akt boıynsha usynylady», dep habarlady Petrov.