Ústel tennısinen sportshylarymyz Brazılııa, Úndistan, Polsha ókilderin jeńip, jartylaı fınalda Taıpeı komandasyna ese jiberdi, dep habarlaıdy Egemen.kz QR Mádenıet jáne sport mınıstrliginiń telegram kanalyna silteme jasap.
Osylaısha, Danııar Iskendırov, Qanat Konkýbaev, Vladımır Nesterov, Abylaı Búrkitbaı quramynda synǵa túsken Qazaqstan komandasy Sýrdlımpıada oıyndaryn úshinshi orynmen qorytyndylady. Sonymen, 1-orynda –Ýkraına, 2-orynda – Taıpeı, al Qazaqstanmen qatar 3-orynda Japonııa tur.
Dzıýdodan komandalyq kezdesýlerde erler arasynda el namysyn Aıdos Túgelbaev, Shaıahmet Qanapııanov, Ádilbek Nurmuhamedov, Ashat Adambaev, Ermek Jánibekuly, Sabyrjan Hapızovtar qorǵady.
«Ulttyq Sýrdlımpıada komıteti jekeleı synda 81 kelide jarysqa shyǵý kerek bolǵan Aıdos Túgelbaevtyń ornyna buǵan deıin irikteý jarysyna qatyspaǵan, sondaı-aq ulttyq shtattyq komanda sapynda joq, alaıda deni saý sportshylar arasynda kúresip júrgen Erkebulan Qanafındi qoıǵan bolatyn.
Degenmen, búgin komandalyq básekede baq synaǵan Aıdos kúni keshe dál osy jarysta 90 kelide kúmis júldeger atanǵan Iran sportshysy Allahkarımı Hosseındi aıqyn basymdyqpen jeńdi. Aıdostyń sheshýshi kezeńdegi jeńisi komandalyq esepte sportshylarymyzdy úshinshi orynǵa shyǵardy», - dep jazylǵan mınıstrlik habarlamasynda.
Sondaı-aq, taekvandodan sportshylarymyz Oljas Rysjanov pen Aıjamol Abdıkatova komandalyq esepte qola júldeni ıelense, Oljas jekeleı synda taǵy bir qola júldeni qanjyǵasyna baılady.