Nur-Sultanda kórkem gımnastıkadan Qazaqstan chempıonaty óz máresine jetti. Bul jarystyń komandalyq saıysy jergilikti sportshylardyń jeńisimen aıaqtaldy.
Elordalyq qyzdar 54.000 upaı jınap, bas júldeni oljalasa, ekinshi oryndy Shymkenttiń qyzdary ıelendi. Olardyń qorjynynda 48.300 upaı bar. Úshinshi orynda – Almaty qalasy. Alataý baýraıynan kelgen qyzdar 45.150 upaıdy enshiledi. Jekelegen básekede Eljana Tánıevaǵa teń keler eshkim tabylmady. Kezinde qyzdar arasynda Azııa chempıony jáne Azııa kýbogynyń ıegeri atanyp, bul kúnderi halyqaralyq dodalarda júlde alyp júrgen Shymkent qalasynyń ókili osy jarysta da asqan sheberlik tanytyp, altynnan alqa taqty. Eljananyń jerlesi Baıan Qoıbaǵar kúmis medaldy moınyna ildi. Bul gımnasshy da sońǵy kezderi aıshyqty ónerimen kózge túsip, birqatar iri dodada jeńis tuǵyryna kóterildi. Nursultandyq Sábına Baqatova qola júldege qol sozdy.