Kókshetaýda Alash ardaqtysynyń 150 jyldyǵyna arnalǵan «Ahmet Baıtursynuly murasy – álemdik rýhanııat keńistiginde» taqyrybyndaǵy halyqaralyq ǵylymı-ádistemelik konferensııa ótkizildi.
Ahmet Baıtursynuly – qazaq halqynyń áleýmettik ómiri men mádenıetine, bolashaǵynyń baıandy bolýyna adal qyzmet etken iri qoǵam qaıratkeri. Jazyqsyz «halyq jaýy» atanyp, atý jazasyna kesilgen qaıratkerdiń artynda qaldyrǵan mol murasy – sarqylyp bitpes qazyna.
Konferensııaǵa alys-jaqyn shetelderdiń áıgili ǵalymdary, ádebıettanýshylar, tarıhshylar, zııaly qaýym men jastar qatysty. HH ǵasyr basyndaǵy qazaq qoǵamynyń rýhanı kósemi, «Alash» qozǵalysy kóshbasshylarynyń biri, ult ustazy, eldi bilimmen sýsyndatqan aǵartýshy, ana tilimizdi túrleýshi, qazaq til biliminiń atasy – Ahmet Baıtursynulynyń eńbekterin álemdik deńgeıde nasıhattap, jańasha baǵalanýyn urpaq sanasyna jetkizý kerek.
– Memleket basshysynyń Jarlyǵyna sáıkes bıyl barshamyz «Alash» qozǵalysynyń qaıratkeri, ult ustazy Ahmet Baıtursynulynyń mereıtoıyn jalpyulttyq deńgeıde atap ótýdemiz, – dedi oblys ákimi Ermek Marjyqpaev, – búgingi konferensııa elimiz úshin abyroıly, jas urpaq úshin tálimdik mańyzy zor sharalardyń bastaýy bolmaq.
Uly ǵalymnyń shyǵarmashylyǵyna arnalǵan «Ulttyń uly ustazy» atty óńiraralyq aıtys, «Rýhanı kósem» taqyrybynda teatrlandyrylǵan qoıylym jáne tilderdi oqytý ortalyqtarynyń oqytýshylary arasynda oblystyq baıqaý ótkiziletin boldy. Jyl boıyna josparlanǵan is-sharalarda «Ahmet taǵylymy» onkúndigi, «Ulttyń rýhanı kósemi» tarıhı saǵattary, «Ulttyq sana sáýlesi» ádebı keshteri, «Ahmet Baıtursynuly – ulttyq til biliminiń negizin qalaýshy» fılologııalyq sımpozıýmy, jas tarıhshy-ólketanýshylardyń forýmy ótedi dep belgilengen. Qazirgi ýaqytta Stepnogor qalasynda 1 mektep pen oblystaǵy eldi mekenderdegi 22 kóshege Ahmet Baıtursynulynyń esimi berilipti. Bıyl Kókshetaý qalasynyń joǵary tehnıkalyq kolledjine, Birjan sal, Jaqsy aýdandarynyń 2 orta mektebine, kóshelerge ǵalymnyń esimi beriletin bolady.
Plenarlyq májiliste О́zbekstannyń Tashkent qalasyndaǵy О́zbek memlekettik álem tilderi ýnıversıtetiniń professory, fılologııa ǵylymdarynyń doktory Mahanbet Júsipov «A.Baıtursynuly eńbekteriniń fonologııa ǵylymyndaǵy orny» taqyrybynda baıandama jasap, ǵalymnyń álem til ǵylymyna, ásirese túrkologııaǵa qosqan eresen eńbegin atap ótti. Túrkııanyń Pamýkkale ýnıversıtetiniń professory, ǵylym doktory Nergız Beraı onlaın baılanysqa shyǵyp, áserli sóz sóıledi. Osylaısha, ult ustazynyń uly eńbegi laıyqty ulyqtaldy.
Kókshetaý