Men 1982 jyly Qazaqtyń aýyl sharýashylyǵy ınstıtýtyn ekonomıst mamandyǵy boıynsha oıdaǵydaı bitirip, arnaıy shaqyrtý qaǵazymen eńbek jolymdy týǵan jerim – burynǵy Sverdlov aýdanyndaǵy (qazirgi Baızaq aýdany Keńes aýyly) «Keńes» ujymsharynda bas býhgalterdiń orynbasary, mal sharýashylyǵy boıynsha býhgalter bolyp bastaǵan bolatynmyn.
Keıinnen ekonomıst bola júrip, ujymshardyń árbir sharýashylyǵyna tikeleı aralastym. Atalǵan aýyldyń negizgi baǵyty mal sharýashylyǵy bolǵandyqtan, mal qysta Moıynqumda, jazda Saryarqa (Qaraǵandy bolysyndaǵy Qarajal qalasynyń mańynda) tósinde jaıylatyn. Al mal basy ósip, onyń ónimderin óndirý josparyn asyra oryndap otyratyn «Keńes» ujymshary aýdandaǵy aldyńǵy qatarly sharýashylyqtardyń biri edi.
Tórt túlik maldyń ortasynda óskendikten, jylqynyń umyt bola bastaǵan túr-túsin, at ábzelderin keıingi jastarǵa, ıaǵnı malsaq jurttyń balalaryna jetkizsem degen oımen bar bilgenderimdi solarǵa úıretýmen kelemin. Bul turǵydaǵy bilimimdi jetildirýge 17 jyldaı Saryarqadaǵy Sarysý aýdanynyń Qamqaly keńsharynda jylqyny bir kisideı baǵyp, ósirgen Baızaq aýdanyndaǵy Qostóbe aýylynyń turǵyny, búginde marqum bolǵan Eńbek Tıyshtyqov aǵanyń qosqan úlesi zor.
Jalpy, jylqy malynyń jasyn, túr-túsin, kerek ábzel-jabdyqtaryn qazaq jastarynyń bile júrgenderi jón. Al aýyldaǵy úlken kisiler men qarııalar nemese tikeleı mal sharýashylyǵymen aınalysatyn mamandar keıingi urpaqqa salt-dástúrlerimizdi bilgenderinshe aıtyp júrse, esh artyqtyq etpeıtini anyq.
Tóle NARJANOV,
aýdandyq tarıhı-ólketaný mýzeıiniń qyzmetkeri
Jambyl oblysy,
Baızaq aýdany