«Gazeta.Ru» tilshileri ǵaryshkerler kúni qarsańynda Mars One halyqaralyq jobasyna qatysyp, óz elinen máńgilikke Marsqa ushyp ketýdi kózdep júrgen reseıliktermen tildesti. Bul týraly «Gazeta.Ru» habarlady.
2013 jyly Mars One qyzyl planetany «otarlaýǵa» attanǵysy keletin erikti ǵaryshkerlerdi irikteý maqsatynda arnaıy halyqaralyq joba usynǵan bolatyn. Atalmysh jobaǵa qatysýǵa 200 myńnan astam adam ótinish bildiripti. Al bulardyń arasynan 1058 adam joba talabyna laıyq dep tanylǵan. Olardyń 52-si reseılikter eken. Bir aıta keter jáıt, jobaǵa qatysýǵa tilek bildirem deýshilerden arnaıy ǵaryshkerlik bilim talap etilmeıdi, tek olardyń jasy 18 ben 65 jas aralyǵynda bolsa jetip jatyr.
Bulardyń Marsqa sapary 2024 jylǵa oraılastyrylyp otyr. Planetaaralyq ekspedısııany uıymdastyrýshylar men Marsqa ushqysy keletinderge dem berýshiler adamdardy Marsqa aman-esen jetkizip, olardyń sonda jumys istep, kún kórýine jaǵdaı jasaýdyń amaldaryn qarastyryp jatqan kórinedi.
Bir ǵajaby, atalǵan halyqaralyq jobada Marsqa barǵandardyń keri qaıtý máselesi qaralmaǵan. Bálkim, joba synaǵynan súrinbeı ótkender Marsta máńgilikke qalýǵa shyn bekingen bolar.
Joldybaı Bazar.
Derekkóz: «Gazeta.Ru».
Foto: iphone-rss.gazeta.ru.