Germanııanyń iri bıznes ókilderi Reseıdegi kásiporyndaryn Qazaqstanǵa kóshirýge nıetti. Bul týraly German ekonomıkasy shyǵys komıtetiniń basqarýshy dırektory Mıhael Harms málimdedi, dep habarlaıdy Egemen.kz.
«Qazirdiń ózinde Reseıden Qazaqstanǵa, Ortalyq Azııaǵa baǵdar jasap otyrǵan kompanııalar jaıynda estip jatyrmyz. German kompanııalarynyń Reseıden Qazaqstanǵa qonys aýdarýdy josparlap otyrǵanyn da bilemiz. Keıbireýlerdiń Reseıde seriktesteri boldy jáne endi olar Qazaqstannyń múmkindikterin qoldanǵylary, Qazaqstan naryǵynda seriktes tapqylary keledi», dedi ol elordada ótken Qazaqstan-german bıznes forýmynda.
Ol, sondaı-aq Qazaqstannyń kásipkerlik áleýeti zor ekendigin, ony german bıznesi de moıyndaıtynyn aıtty.
«Taıaý ýaqytta úlken ózgerister bolatyndyǵyn kórip otyrmyz. Men german bıznesin bizge qosylýǵa shaqyramyn. Kóptegen kompanııa qazirdiń ózinde bizge júginip jatyr. Bul Qazaqstanda jumys isteý múmkindigin qarastyryp otyrǵan barlyq german kompanııasy úshin jaqsy belgi», dep qosty Mıhael Harms.