Uly Otan soǵysynda erligimen el esinde qalǵan erender, Keńes Odaǵynyń batyrlary Mánshúk Mámetova, Talǵat Bıgeldınov jáne Qazaqstannyń Halyq jazýshysy Ázilhan Nurshaıyqovtyń týǵanyna bıyl 100 jyl! Ataýly mereıtoıǵa oraı elordadaǵy Beıbitshilik jáne kelisim saraıynda «Maıdan hattary» atty teatrlandyrylǵan konserttik baǵdarlama kópshilik nazaryna usynyldy. Nur-Sultan qalasy ákimdiginiń qoldaýymen ótken taǵylymdy keshtiń avtory – Nazgúl Sarybaı.
Oq pen ottyń ortasynda júrip, eren erlik kórsetip, óshpes dańqqa bólengen batyrlardyń esimi halqynyń jadynda máńgilikke jattaldy. Jyldar uzaǵan saıyn jarqyn beıneleri men bekzat bolmysy el júregine jaqyndaı túseri jáne aqıqat jaıt. Al ýaqyt aǵzam alaqanynda bederlengen eren erlikteri óskeleń urpaq úshin ultyn súıý men halqyna qaltqysyz qyzmen etýdiń jarqyn kórinisi bolyp máńgilik jasaı bermek. «Maıdan hattary» arqyly syr shertilgen surapyl jyldar shyndyǵy kórkem óner tilinde osy murat jolynda taǵylym túıgizdi.
О́ner men ónege qatar órilgen mazmundy keshte Keńes Odaǵynyń batyry Mánshúk Mámetovanyń haty, qarý men qalamdy qatar arqalaı júrip soǵysqan maıdanger jazýshy Ázilhan Nurshaıyqovtyń kúndeliginen estelik jáne basqa da maıdan hattary oqyla otyryp, sol negizde qoıylǵan teatrlandyrylǵan shaǵyn kórinister konserttik baǵdarlamanyń kórkemdik deńgeıi men mazmundyq mánin odan ári baıyta tústi. Sondaı-aq kesh barysynda Keńes Odaǵynyń eki márte batyry Talǵat Bıgeldınovtiń tarıhı suhbaty kórsetildi.
Máńgilik erlik taqyrybyn arqaý etken taǵylymdy týyndynyń talǵam bıiginde saraptalýyna ter tókken sahnagerler qatarynda Qazaqstannyń Halyq ártisi Tilektes Meıramov, belgili teatr jáne kıno akteri, Memlekettik syılyqtyń laýreaty Ádil Ahmetov, Qazaqstannyń eńbek sińirgen qaıratkeri Aıgúl Imanbaeva bastaǵan elorda teatrlarynyń jetekshi akterleri bar. Basty róldi somdaǵan ártister Tilektes Meıramov pen Ádil Ahmetovtiń áńgimeleýi arqyly surapyl soǵys jyldarynyń tarıhı paraqtary aqtaryldy. Árbir sahnalyq qoıylym sahna tórindegi alyp ekranda salynǵan grafıkalyq rekonstrýksııalarmen bezendirilip, sol arqyly kórermendi maıdan alańy men tyldaǵy tirshilikke tereń boılatty.
Bala rólinde sátti beıne jasaǵan «A.I. teatrynyń» jas akteri Táńirbergen Ibadýllaevtyń talanty da kelgen kórermendi tańdaı qaqqyzbaı qoımady. Jas bolsa da ról tabıǵatyn jiti túsinip, tushymdy beıne týdyra bilgen baldyrǵan óneri bolashaǵynan zor úmit kúttiredi.
Merekelik konsertte teatrlandyrylǵan qoıylymdarmen qatar, sondaı-aq soǵys jyldaryndaǵy áıgili ánder R.Rymbaeva, M.Arapbaeva, A.Jyltyrgózov, T.Musabaev, R.Jarmaǵambetov, K.Tólenbaeva, G.Myrzabekova, E.Rysqalı, J.Maıasarov, R.Baıdúkenova bastaǵan dástúrli jáne estrada ánshileriniń oryndaýynda kópshilik kóńilin qozǵady. Sazynan góri armany, muńy men ókinishi basym ánder soǵystyń surapyl jyldaryna sapar shektire otyryp, qasiretti jyldardyń kórinisin shynaıy sezindirdi hám tynyshtyq pen beıbit kúnniń qadirine jeter eshnárse joq ekendigin shyn uǵyndyrǵandaı boldy. Ásirese, Ramazan Elebaevtiń «Jas qazaq», Qasym Amanjolovtyń «Darıǵa, sol qyz», Seıdolla Báıterekovtiń «Álııa» ánderin tyńdaǵanda tebirenbegen, tolqymaǵan kórermen, egilmegen júrek joq. Kesh sońynda batyrlar rýhyna bas ıip, qurmet kórsetken kórermenniń soqqan shapalaǵy uzaq ýaqyt tolastamady.