Álemdik buqaralyq aqparat quraldary Reseı sarbazdarynyń Ýkraınadaǵy áskerı qylmystary kórsetilgen vıdeolardy jarııalaı bastady. Osyndaı vıdeolardyń birinde Kıev syrtyndaǵy ǵımarattyń qasynda qarýsyz eki adamdy syrtynan atyp tastaǵany beınelengen.
CNN agenttiginiń habarlaýynsha, qaza tapqandardyń biri – Leonıd Plıas esimdi zeınetker. Ol Ýkraına astanasynyń syrt jaǵynda ornalasqan avtoortalyqta kúzetshi bolyp nápaqasyn taýyp júrgen.
Vıdeoda bes sarbazdyń ǵımaratqa kelgeni, sodan keıin kúzetshi Plıas pen taǵy bir qyzmetkerdiń olarmen sóıleskeni kórinedi. Birneshe mınýttan keıin áskerıler burylyp ketedi, al marqum ekeýi óz oryndaryna qaraı qaıtqan. Degenmen eki sarbaz qaıtyp oralyp, ketip bara jatqan ekeýdiń artynan avtomattan oq jaýdyrady.
Biraz ýaqyt ótken soń Plıastyń aqsańdaı basyp, óz ornyna jetkeni, sodan keıin bireýge telefon arqyly habarlasqany beınelengen. CNN taratqan vıdeo 16 naýryz kúni túsirilgen. Avtoortalyq zamanaýı kameralarmen jabdyqtalǵandyqtan, reseılikterdiń áreketi jan-jaqtan túsirilgen eken. Olar beıbit eki turǵyndy atyp tastaǵannan keıin ǵımarattyń ishine kirip, qundy dúnıeler izdegen. Bireýi tartpalardyń birinen spırttik ishimdik taýyp alyp, sony ishedi.
Amerıkalyq arna Reseıdiń qorǵanys mınıstrligine habarlasyp, vıdeoǵa qatysty túsinikteme berýdi suraǵan. Biraq vedomstvo CNN-niń suraýyna jaýap bermepti. Buǵan deıin batys medıasy Reseı sarbazdary jasady delingen kóptegen áskerı qylmystardy jarııalaǵan edi.
Esterińizde bolsa, 2 sáýirde Kıev túbindegi Býcha qalasynda júzdegen beıbit adamnyń máıiti shashylyp jatqany týraly aqparat tarady. Bul eldi mekendi Reseı áskeri soǵystyń alǵashqy kúnderi basyp alyp, bir aıdaı baqylaýynda ustaǵan edi. Halyqaralyq qoǵamdastyq pen Ýkraına tarapy beıbit azamattardyń ólimine Reseı sarbazdaryn kinálady. Kreml bıligi muny joqqa shyǵaryp, Býchadaǵy qyrǵyndy «jasandy qoıylym» dep málimdedi.
Biraq spýtnıkten túsirilgen sýretter men vıdeolar qaza tapqan beıbit turǵyndardyń máıiti naýryzdyń ortasynan beri kóshelerde shashylyp jatqanyn, ıaǵnı Reseı áskeri qalany basyp alǵan merzimde ólgenin dáleldedi. Sonymen qatar Býchada velosıpedpen ketip bara jatqan turǵyndy tankpen atyp óltirgeni de dron arqyly túsirilgen vıdeoǵa jazylyp qalǵan eken.
Budan bólek naýryzdyń basynda birneshe medıa, arasynda reseılik táýelsiz arnalar da bar, Kıev mańyndaǵy Makarov eldi mekeninen shyǵar tusta V belgisi bar tanktiń burylysta toqtap turǵan kólikti birneshe ret atqany jazylǵan vıdeo jarııalady. Keıinirek kóliktiń ishinde eki adamnyń bolǵany, olardyń 70-ten asqan zeınetkerler ekeni anyqtaldy.
BUU-nyń adam quqyqtary jónindegi basshysy sońǵy aptalarda Ýkraına astanasy Kıev aımaǵynda myńdaǵan máıittiń tabylǵanyn habarlady. Reseı basyp alǵan aımaqta tekserý júrgizilip jatqanyn, Reseı sarbazdary áskerı qylmys jasaýy múmkin ekenin jetkizdi.
«Zańsyz kisi óltirýlerdiń aýqymy, sonyń ishinde Kıevtiń soltústigindegi aýdandarda ólim jazasyna kesilgenderdiń aýqymy jan túrshiktiredi», dedi Mıshel Bachelet Jenevada ornalasqan Adam quqyqtary keńesine joldaǵan beıneúndeýinde.
Birikken Ulttar Uıymynyń Adam quqyqtary jónindegi Joǵarǵy komıssary (OHCHR) basqarmasynyń málimetinshe, búginge deıin Ýkraınada 3 496 beıbit turǵyn qaza taýyp, 3 760 adam jaralanǵan. Sonyń ishinde balalar da bar. Uıymnyń derekterine súıensek, qaıtys bolǵandardyń kópshiligi artıllerııalyq jáne zymyrandyq shabýyldar men áýe soqqylarynyń qurbandary.
OHCHR sarapshylary qaza tapqandardyń naqty sany áldeqaıda kóp dep sanaıdy. О́ıtkeni soǵys júrip jatqan aımaqtardan alynǵan aqparat tolyq emes. Ári muqııat tekserýdi qajet etedi. Ásirese Marıýpol, Izıým jáne Popasnaıa qalalarynda qaza tapqandardyń sany myńdap sanalýy múmkin.
Máselen, Marıýpol qalasynaǵy teatrǵa Reseılikter zymyran tastaǵany belgili. Buqaralyq aqparat quraldary onda myńǵa jýyq bala men áıelder bombadan qashyp, tyǵylyp jatqanyn jazdy. Biraq teatrdaǵy jasyrynǵandardyń qanshasy qaza taýyp, qanshasy tiri qalǵany belgisiz.