QR Úkimet basshysynyń birinshi orynbasary Roman Sklıar álem boıynsha avtokólikterdiń jappaı qymbattaýy Qazaqstanǵa qalaı áser etip jatqanyn aıtty, dep habarlaıdy Egemen.kz.
«Álem boıynsha avtokólikterdiń qymbattap ketkeni barshamyzǵa málim. Eger koreıalyq markadaǵy tanymal kólikter bizde qymbattasa, bul kólikterge barsha álemde de baǵanyń óskenin kórýge bolady. Atap aıtqanda, metall quny, tasymaldaý qyzmetteri, logıstıka qymbattady. Osynyń barlyǵy obektıvti trend jáne biz de onyń áserinen aınalyp kete almaımyz», dedi Roman Sklıar elordada munaı-gaz mashına jasaý salasyn damytýǵa arnalǵan forým barysynda.
Onyń aıtýynsha, avtodılerler óz qyzmetin qoldanystaǵy zańnama aıasynda júrgizip jatyr.
«Olar shetelden avtomobıl satyp alyp, onyń bárin zańnamalyq negizde ótkize alady. Alaıda avtosalondarda qosymsha qyzmetterdi alýǵa májbúrleıtinderge qatysty toqtalsaq, olardyń jumysyn tıisti memlekettik organdar tekserýi kerek», dep túıindedi Úkimet basshysynyń orynbasary.