Referendýmnyń mańyzdylyǵy jaıly keıbir turǵyndar bile bermeýi múmkin. Bul sózdi alǵash ret estigender de bar. Osy rette, Pavlodar oblysyna jumys saparymen kelgen Májilis depýtattary Aıgúl Nurkına, Vera Kım men Anatolıı Boıchın 3 maýsymǵa deıin qala, aýdandardy aralap, referendýmǵa baılanysty túsindirme jumystaryn júrgizýdi josparlap otyr.
Jýyqta halyq qalaýlylary oblys ortalyǵyndaǵy kardıologııalyq ortalyqtyń ǵımaratynda densaýlyq saqtaý uıymdary qyzmetkerlerimen kezdesip, mańyzdy shara jaıly áńgime órbitti.
– Bul referendým ár qazaqstandyqqa óziniń pikirin bildirýge múmkindik beredi. Konstıtýsııaǵa enetin ózgerister bes baǵytqa bólinetin bolady. Bes baǵyt bir adammen nemese depýtattarmen emes, halyqtyń qalaýymen bekitiledi. El turǵyndary memleketti basqarý isine aralasyp, kókeıde júrgen túıtkilderdi ortaǵa salady. «Halyq únine qulaq asatyn memleket» tujyrymdamasynyń kózdegeni de sol. Osylaısha, Konstıtýsııanyń úshten bir bóligine ózgerister engiziletin bolady, – dedi Vera Kım.
О́z kezeginde kardıologııalyq ortalyqtyń dárigeri Dýman Izgýtdınov Ata Zańǵa ózgerister engizý arqyly oń nátıjelerdiń oryn alatynyna senim bildirdi. «Referendým ótkizý arqyly Jańa Qazaqstannyń irgetasyn myqtap qalaýǵa múmkindik zor. Kóptegen oń ózgeris oryn alatynyna senim mol. Referendýmdy alǵash ret bastan ótkizbekpin. Otbasymen birge mańyzdy sharaǵa qatysýǵa nıet tanytyp otyrmyz», dedi ol.
Budan keıin Májilis depýtattary Ýspen aýdanynyń shalǵaı aýyldaryna atbasyn burdy. Respýblıkalyq shtabtyń múshesi Aıgúl Nurkına referendýmnyń mańyzdylyǵyna toqtalyp, Parlamenttiń róli men mártebesiniń ózgerýi jóninde túsindirdi.
– Májilis aralas saılaý júıesi boıynsha partııalyq tizimder negizinde jáne bir mandatty aýmaqtyq okrýgter boıynsha qurylatyn bolady. Budan bólek, Májilis zańdardy óz betinshe qabyldaýǵa quqyly. Jalpy, Parlamenttiń róli nyǵaıyp, sol arqyly memlekettiń ınstıtýsıonaldyq turaqtylyǵy artady, – dedi Aıgúl Nurkına.
Aýyl turǵyndary Konstıtýsııada bolatyn ózgeristerge qyzýshylyqtaryn bildirip, ózderiniń saýaldaryn qoıdy.
Pavlodar oblysy