Bıyl ótetin negizgi Ulttyq biryńǵaı testileýge qujat qabyldaý bastaldy. Bul – mańyzdy testileý. О́ıtkeni sonyń nátıjesi boıynsha talapker memlekettik bilim grantyn ıelene alady. Bıylǵy UBT-nyń jańalyǵy – talapker tegin oqýǵa múmkindik beretin basty testileýdi eki ret tapsyra alady. Soǵan saı talaptar da kúsheıtilgen. Bul týraly Prezıdent janyndaǵy Ortalyq kommýnıkasııalar qyzmetiniń alańynda ótken brıfıngte aıtyldy.
Baspasóz konferensııasynda sóz alǵan Joǵary jáne joǵary oqý ornynan keıingi bilim departamentiniń dırektory Ádilet Toıbaev:
– 2022 jylǵy negizgi UBT-ǵa 130 myńnan asa adam tirkeldi. О́tinishter 14 mamyrǵa deıin qabyldandy. Testileýdiń ózi 16 mamyr men 5 shilde aralyǵynda ótedi. UBT-ǵa qatysý úshin http://app.testcenter.kz saıtynda ótinish berýge bolady. Sondaı-aq talapkerler negizgi UBT-ny eki ret tapsyryp, úzdik nátıjemen granttardy taǵaıyndaý konkýrsyna qatysa alady. Bul – bıylǵy testileýdiń eń mańyzdy jańalyǵy. Pánderdiń sany ózgerissiz qalady: úsh mindetti jáne eki tańdaý. Test tapsyrmalarynyń sany – 120. Onyń ishinde Qazaqstan tarıhynan – 15, matematıkalyq saýattylyqtan – 15, oqý saýattylyǵynan – 20 jáne eki beıindik pánnen – 35. Eń joǵarǵy upaı sany – 140. Testileýdiń jalpy ýaqyty – 4 saǵat (240 mınýt). Al taǵy bir ózgeriske kelsek, bıyl talapker birinshi testileýde tańdaǵan pánin ekinshi UBT-da aýystyrýǵa bolmaıdy. Osy jylǵy testileýdiń taǵy bir ereksheligi – eger birinshi testileý kezinde ereje buzylsa, onda ekinshi ret tapsyra almaıdy. Al eger ekinshi testileý kezinde erejeler buzylsa, onda birinshi jáne ekinshi synaqtyń nátıjeleri joıylady, – dedi.
Departament dırektorynyń aıtýynsha, shekti ball boıynsha qatty ózgeris joq, tek quqyq baǵytynda joǵary bilim alýǵa ótý kórsetkishi 75 balǵa artty. Erekshe bilim alýdy qajet etetin balalarǵa testileýde qosymsha 40 mınýt beriledi. Sonymen qatar olardyń qabileti men ereksheligine, múmkindikterine qaraı testileýdiń sapasy da, qurylymy da ózgerdi. Akademııalyq adaldyqty saqtaý úshin talapkerlerdiń test nusqasy tańbalanady, ıaǵnı árbir qatysýshynyń jeke test nusqasy bolady. Talapkerler erejelerdi buzǵan jáne aýdıtorııadan tys jerlerge test tapsyrmalaryn shyǵarýǵa áreket jasaǵan jaǵdaıda olardyń nátıjeleri joıylady. Aqparattyq qaýipsizdik maqsatynda testileý buryn 1 kamera arqyly ótkizilip kelgen bolsa, bıyldan bastap «1 kompıýter – 2 kamera – 1 testilenýshi» qaǵıdatymen júrgiziledi.