Jaz qabaǵy jadyraı qoımasa da, kene shaǵý deregi kún saıyn derlik tirkelýde. Epıdemııalyq kezeń bastalǵaly oblysta kene shaǵýdyń 90 deregi tirkelgen. Bir ókinishtisi, oqys oqıǵanyń jartysyna jýyǵy 14 jasqa deıingi balalar arasynda oryn alyp otyr.
О́tken jylǵy sáıkes merzimmen salystyrǵanda, kene shaǵý kesapatynyń 1,8 esege kóbeıip, balalar arasynda 2,9 ese ulǵaıǵanyn aıta ketken artyq bolmas. О́ńirde oryn alǵan oqıǵalardyń deni Býrabaı, Zerendi jáne Sandyqtaý aýdandarynyń enshisinde.
– Kene ensefalıti boıynsha epıdemııalyq ahýal Sandyqtaý aýdanynda ýshyǵyp tur. Bul aýdanda sońǵy eki jylda birneshe derek tirkeldi. Jyl saıyn selolyq okrýgter mańynda zııankesterdi ýlap, joıý jumystary júrgizilgenimen, nátıjesi kóńil kónshitpeıdi, – deıdi oblystyń bas sanıtarlyq dárigeri Aınagúl Mýsına.
Keneden kesel kelmes úshin osy jyly 1 200 synama zerttelip, nátıjeleri durys boldy. Árıne deneńizge ýly jándiktiń tumsyǵy tıse, birden medısınalyq kómekke júgingen jón. Onda da mamandardyń aıtýyna qaraǵanda, keshikpegen abzal. Sáýir aıynan beri qapylysta kene shaǵyp, zardap shekken ondaǵan adam medısınalyq kómekke júginip, 67-si ımmýnoglobýlınmen aldyn alý emderin jasaǵan. О́z densaýlyǵyna nemketti qarap, em qabyldaýdan bas tartatyndar da kezdesedi. Bul arada oqyrmannyń esine sala ketetin bir jaı, eger kene juqpaly aýrýdy tasymaldaýshy bolsa, onda adam aýyr naýqastarǵa shaldyǵýy ábden múmkin. Túsinikti bolýy úshin sál taratyp aıta ketelik. Mamandardyń aıtýyna qaraǵanda, kene ensefalıti óte qaýipti. Adam aǵzasynda jyldam damyp, júıke júıesin zaqymdaýy ábden yqtımal. Alǵashqy belgileri apta aralatyp qana paıda bolady eken.
Tabıǵat aıasynda demalýshylardyń qaperinde qorǵanysh máseleleri júrgeni jón. Al aýyl sharýashylyǵynyń eńbekkerleri osy qaýiptiń bel ortasynda júr. Keneden keler kesapattan saý qalý úshin saqtaný artyqtyq etpeıdi.
Aqmola oblysy