Keshe bokstan Ystanbulda ótip jatqan álem chempıonatynyń shırek fınaldyq saıystary ótti. Jarystyń kúndizgi baǵdarlamasynda bes boksshymyz sharshy alańǵa shyǵyp, solardyń tórteýi jartylaı fınalǵa joldama aldy. Olar – Alýa Balqybekova, Jaına Shekerbekova, Karına Ibragımova, Valentına Halzova. Al keshki baǵdarlamada synǵa túsken Dına Jolaman da júldegerler qatarynan kórindi.
Jarys bastalǵan bette Nazym Qyzaıbaı (50 kılo), Rımma Volosenko (60 kılo), Aıda Ábikeeva (63 kılo), Darıǵa Shákimova (66 kılo), Nadejda Rıabes (75 kılo) jáne Lázzat Kúngeıbaeva (+81 kılo) syndy beldi boksshylarymyz jeńilistiń kermek dámin tatqanda qazaq jankúıerleriniń kóńili qatty qulazyǵan edi. Oǵan Halyqaralyq boks qaýymdastyǵynyń (IBA) týy astynda óner kórsetken atyshýly Angelına Lýkasty qosyńyz. Olar «Bizdiń esh kinámiz joq. Barlyq «gáp» tóreshilerde» dep qansha jerden aqtalsa da, bıylǵy jyldyń basty dodasyna boksshylarymyzdyń tym nashar daıarlyqpen kelgeni syrt kózge anyq baıqaldy. Osylaısha, Túrkııaǵa sapar shekken 12 boksshymyzdyń teń jartysy jarysty aıaqtap, qalǵan altaýy shırek fınalǵa joldama alǵan edi.
Keshe shırek fınaldyq saıystar ótti. Bul joly bylǵary qolǵap sheberlerimiz qulazyǵan kóńilimizdi bir serpiltip tastady. 48 kılo salmaqta synǵa túsken Alýa Balqybekova úndistandyq Nıtý Nıtýdy ádemi utsa, ile-shala rıngke 52 kılo salmaqtaǵy Jaına Shekerbekova kóterildi. Italııalyq Olena Savchýkke qarsy saıysta durys taktıka qura bilgen Jaına jeńiske jetti. 57 kılo salmaq dárejesinde óner kórsetken Karına Ibragımova osy mejede myqty qarsylasqa tap boldy. Ol Eýropa oıyndarynyń kúmis jáne Eýropa birinshiliginiń qola júldegeri ırlandııalyq Mıkaela Ýolshpen kúsh synasty. Alaıda qarsylasynyń ataǵynan esh qaımyqpaǵan Karına kózdegen maqsatyna qol jetkizdi.
Valentına Halzova (70 kılo) aýstralııalyq Keı Skottpen qolǵap túıistirdi. 36 jastaǵy jasyl qurlyqtyń ókili 2016 jyly Astanada ótken álem chempıonatynda kúmis medaldy moınyna ilgen edi. Ol kezde Keı 81 kılo salmaqta óner kórsetti. Odan keıin salmaq qýyp, ózinen áldeqaıda jeńil qarsylastarmen judyryqtasýdy jón kórgen eken. Birinshi raýndtan bastap tizgindi óz qolyna alǵan Valentına qarsylasynyń erkin kósilýine esh múmkindik bermedi. Tóreshiler biraýyzdan Halzovanyń myqtylyǵyn moıyndady. Besinshi bolyp sharshy alańǵa shyqqan Gúlsaıa Erjannyń (81 kılo) lıtvalyq Gabrıele Stonkýtege áli jetpedi. Al keshki baǵdarlamada Dına Jolaman (54 kılo) Elena Zekıchpen sheberlik baıqasyp, tóreshilerdiń sheshimimen jeńiske jetti.
Esterińizge sala keteıik, atalǵan jarys 20 mamyrda óz máresine jetedi. Álem chempıony atanǵan boksshylar 100 myń AQSh dollary kóleminde syıaqy alsa, fınalǵa shyqqandar 50 myńdy qaltaǵa basady. Al qola júldegerlerge 25 myń dollardan tıedi.