Parlament Senatynyń depýtaty Muhtar Qul-Muhammed Birikken Ulttar Uıymynyń Ortalyq Azııadaǵy bosqyndar isi jónindegi Joǵarǵy komıssary basqarmasynyń ókili Hans Shoddermen kezdesti.
Halyqaralyq qatynastar, qorǵanys jáne qaýipsizdik komıtetiniń tóraǵasy Muhtar Qul-Muhammed óz sózinde Qazaqstan Konstıtýsııasyna ózgerister engizý jónindegi bıylǵy 5 maýsymǵa belgilengen aldaǵy referendýmnyń mańyzyn atap ótti.
«Konstıtýsııaǵa túzetýler sýperprezıdenttik basqarý formasynan yqpaldy Parlamenti men esep beretin Úkimeti bar prezıdenttik respýblıkaǵa túpkilikti kóshýdi bekitýge arnalǵan. Konstıtýsııalyq reforma bıliktiń ókildi tarmaǵyn edáýir kúsheıtip, tejemelik ári tepe-teńdik júıesin nyǵaıtýǵa tıis. Osyǵan baılanysty, aldaǵy referendým árbir azamatqa Ekinshi respýblıkaǵa kóshýdi aıqyndaıtyn tarıhı oqıǵaǵa tikeleı qatysýǵa múmkindik beredi», dep atap ótti Muhtar Qul-Muhammed.
Muhtar Qul-Muhammed áńgime barysynda BUU-men yntymaqtastyq Qazaqstannyń syrtqy saıasatynyń negizgi basymdyǵy ekenin atap ótti. Ol sondaı-aq bizdiń elimiz BUU-nyń bosqyndar quqyqtaryn saqtaý men qorǵaý salasyndaǵy qundylyqtary men maqsattaryn qorǵaý jónindegi jetekshi halyqaralyq agenttik retinde Basqarmanyń qyzmetin joǵary baǵalaıtynyn atap ótti.
Hans Shodder óz kezeginde bizdiń elimizdiń osy baǵytta júrgizip jatqan jumysyn joǵary baǵalady jáne adamdardyń quqyqtaryn qorǵaý jónindegi birlesken qyzmet Qazaqstan men BUU arasyndaǵy qarym-qatynasty jaqsartyp qana qoımaı, olardy jańa deńgeıge kóteretinin atap ótti.
«Biz Aýǵanstanǵa járdemdesý jónindegi mıssııany jáne Aýǵanstanda tirkelgen BUU-nyń basqa da agenttikterin Almatyda ýaqytsha ornalastyrǵany úshin Qazaqstan basshylyǵyna erekshe alǵysymyzdy bildiremiz. Almatyda BUU-nyń óńirlik habyn qurýǵa keletin bolsaq, ol Ortalyq Azııa men Aýǵanstandaǵy Basqarma isine qarqyn berýmen qatar qyzmetiniń nátıjeli bolýyn aıtarlyqtaı arttyrady», dedi BUU Bosqyndar isteri jónindegi Joǵarǵy komıssary basqarmasynyń óńirlik ókili.