Qasym han beınelengen alyp kartına Almaty qalasyndaǵy Zeınolla Qabdolov jáne О́tegen batyr kósheleriniń qıylysynda ornalasqan Grand Park saýda kesheniniń qabyrǵasyna salyndy.
Sh.Aımanov atyndaǵy «Qazaqfılm» kınostýdııasynyń tapsyrysy boıynsha salynǵan mýral alystan kóz tartady. Aýqymdy kóshe týyndysy kóshpendilerdiń ómir súrý saltynyń altyn erejesi men buljymas qaǵıdasyn tarıhta alǵash ret «Qasym hannyń qasqa joly» atty zań jıyntyǵymen júıelep ketken bıleýshi týraly fılmniń prokatqa shyǵýyna oraı salynyp otyr. XV-XVI ǵasyrda memleket irgesin qalyptastyrý jolynda Qazaq eliniń erkindigi men táýelsizdigi úshin kúres júrgizgen Qasym hannyń tarıhtaǵy ornyn beınelegen Aqan Sataevtyń «Uly dala tańy» fılmi 12 mamyrdan bastap barlyq kınoteatrda kórsetile bastady.
Mýraldy jas sýretshiler Karına Ázimjanova jáne Ǵafýra Qaıyrbekova saldy. Olardyń aıtýyna qaraǵanda, Qasym hannyń beınesin salýǵa bir apta jáne 120 ballon boıaý ketken.
ALMATY