Konstıtýsııaǵa túzetýler engizý boıynsha respýblıkalyq referendýmdy túsindirý maqsatymen Májilis depýtattary Meırambek Tólepbergen, Nazılıa Razzak jáne Gúldara Nurymova Jambyl oblysy, Jambyl aýdany, Aısha bıbi aýylynyń zııaly qaýym ókilderimen kezdesti.
Jıynda halyq qalaýlylary Konstıtýsııalyq reforma azamattardyń eldi basqarý isine qatysý múmkindigin arttyratynyna jáne aldaǵy ýaqytta áleýmettik ádilettiliktiń ornaýyna jol ashatynyn aıtyp, aldaǵy naýqannan qalys qalmaýǵa shaqyrdy.
– Referendým – qoǵam arasynda qyzý talqylanyp, qoldaý taýyp otyr. Konstıtýsııany búkilhalyqtyq daýys berý arqyly ózgertý – halyqtyń erkin bildirýiniń aıqyn kórinisi. О́zgeris az emes. Sonyń biri – Parlamenttiń róli kúsheıip, mártebesi artady. Májilisti qalyptastyrýdyń aralas modeli enedi, Parlamenttiń baqylaý fýnksııalary da keńeıedi. Iаǵnı azamattardyń múddesin qorǵaý mehanızmi kúsheıedi, – dedi Meırambek Tólepbergen.
О́z kezeginde Gúldara Nurymova referendým bolashaǵymyzdy aıqyndaıtyn izgi bastama ekenin alǵa tartyp, elimiz saıası ózgeristerdiń aldynda turǵanyn atap ótti.
Al Nazılıa Razzak aldaǵy aýqymdy reformalardy zańmen bekitý úshin bizge referendým qajet ekenin aıtty.
– Bul el damýy úshin mańyzdy qadam. «Halyq únine qulaq asatyn memleket» ıdeıasynyń naqty júzege asýynyń dáleli. Biz daýys berýshiler retinde osy naýqanǵa atsalysamyz. Bolashaq – jastardyń qolynda. Barlyq bastama solar úshin qolǵa alynyp jatyr. Sondyqtan bul is-sharanyń ortasynan áýeli jastardyń tabylýyna jol silteýimiz kerek, – dedi Aısha bıbi aýyldyq ardagerler keńesiniń tóraǵasy Jarqyn Qalybaev.
Jınalǵandardyń pikirinshe, bul referendým ádiletti, ári ashyq memleket qurýdyń bastamasy.
Jambyl oblysy