Bilim jáne ǵylym mınıstrligi Balalardyń quqyqtaryn qorǵaý komıteti Balalar jyly aıasynda «Bala Qorgau» ınternet-resýrsyn iske qosty. Endi mektepterde QR-kody jáne «Bala Qorgau» saıtynyń https://bala.gov.kz mekenjaıy jazylǵan arnaıy taqtaıshalar ornatylyp jatyr.
QR-kodty skanerleý arqyly oqýshylar «Bala Qorgau» saıtyna ótip, óz suraqtaryn qoıa alady. Oqýshylar men ata-analar da jasyryn túrde kómek surap, bilim berý uıymdaryndaǵy zańsyz áreketter týraly habarlaı alady. О́tinish berýshilerdiń anonım bolyp qalatynyna kepildik beriledi.
Búginge deıin Nur-Sultan men Almatynyń birneshe mektebinde QR-taqtaıshalar ornatyldy. Aldaǵy ýaqytta olar basqa da bilim berý uıymdarynda ornatylady. Qazirdiń ózinde 100-den asa ótinish tústi, olar negizinen balalar men ata-analar arasyndaǵy qarym-qatynas máselelerine qatysty.
– «Bala Qorgau» saıty oqýshylar árdaıym qajetti qoldaý men kómek surap, ózderin qaýipsiz sezinýi úshin jasalǵan. Ártúrli jaǵdaıǵa tap bolǵan balalar kóbinese ózderine nemese qurdastaryna qatysty býllıng faktilerin kimge habarlaý kerek ekenin bilmeıdi. Endi oqýshylar QR-kodty skanerlep, bizben baılanysa alady, sóıtip olarǵa qajetti konsýltasııa, psıhologııalyq kómek kórsetiledi. Veb-saıt oqýshylardy tolǵandyratyn ózekti máselelerdi, sondaı-aq balalar quqyqtaryn buzý faktilerin tez arada anyqtaýǵa kómektesedi. Bul resýrs oqýshylardyń jáne olardyń ata-analarynyń quqyqtyq saýattylyǵyn arttyrýǵa septigin tıgizedi, – dedi BǴM Balalardyń quqyqtaryn qorǵaý komıteti tóraǵasynyń orynbasary Elına Paýlı.
Saıtta oqýshylar men ata-analar belgili bir jaǵdaıǵa tap bolǵanda ózin qalaı ustaý kerek ekeni týraly keńester taba alady. Mysaly, jańa dostar tabýǵa, jaman ortaǵa tap bolmaýǵa qatysty aqparat bar. Balalar suraqty ashyq ta, jasyryn da qoıa alady. Bul úshin veb-saıtta ótinish qaldyrý kerek, keıin keńesshiler keri baılanys jasap, balalar men ata-analardy mazalaıtyn suraqtarǵa jaýap beredi.