Memleket basshysy Nursultan Nazarbaevtyń atyna «Qazaqstandyq ónimdi jasaıyq» V forýmyna qatysýshylardan hat keldi, dep habarlady Prezıdenttiń baspasóz qyzmeti.
Avtorlar bul forým jumysyna 500-den astam delegat – 10 myńnan asa adam jumys isteıtin 200-den astam otandyq kompanııa ókilderi qatysqanyn málimdegen.
«Forým deńgeıi iri kompanııanyń biriniń jergilikti jetkizýshilermen ózara qarym-qatynasyn talqylaý sheńberinen asyp tústi. Bul kezdesý jalpy respýblıkalyq únqatysý alańyna aınaldy, onyń basty maqsaty – Qazaqstandaǵy shaǵyn jáne orta bızneske júıeli ári tıimdi qoldaý kórsetý, ony ártaraptandyrý», – delingen hatta.
Hat sońynda Otandyq óndirýshiler forýmyna qatysýshylar Memleket basshysyna qazaqstandyq úlesti damytý máselelerine erekshe kóńil bólinip otyrǵany úshin rızashylyqtaryn bildirgen.
«Biz bul bastamaǵa salalyq vedomstvolar men iri kompanııalardyń orasan mol kúsh-jigeri jumyldyrylǵanyn túsinemiz jáne óz tarapymyzdan qazaqstandyq óndirýshilerge artylǵan senimdi aqtaýǵa daıynbyz», – dep atap ótken avtorlar.