Sarapshylardyń oń baǵasy

BUU-nyń Sybaılas jemqorlyqqa qarsy konvensııasyn júzege asyrýdy sholý sheńberinde halyqaralyq sarapshylar Astana qalasynda boldy. Astanaǵa Qazaqstannyń BUU-nyń Sybaılas jemqorlyqqa qarsy konvensııa qaǵıdalaryn júzege asyrý barysyn sholý maqsatynda Pákistan men Katar sarapshylary kelip qaıtty. Sholý barysynda sarapshylar BUU-nyń Sybaılas jemqorlyqqa qarsy konvensııa qaǵıdalaryn is júzinde qoldanýdyń praktıkalyq mysaldarymen tanysyp, Qazaqstan Parlamenti Senaty jáne Májilisi depýtattarymen, Joǵarǵy Sot, Ekonomıkalyq qylmys jáne sybaılas jemqorlyqqa qarsy kúres agenttigi, Bas prokýratýra, Ishki ister mınıstrligi, Qar­jy mınıstrligi, Syrtqy ister mınıs­trligi jáne Memlekettik qyzmet isteri jónindegi agenttik qyzmet­kerlerimen kezdesýler ótkizdi. Sondaı-aq, sarapshylar Qa­zaq­stannyń úkimettik emes uıymdary ókilderimen de júzdesip, ol kezdesýler qorytyndylary boıynsha, Pákistan men Katar sarapshylary eldik sapar uıymdastyrylýynyń joǵary deńgeıin atap ótip, qazaqstandyq taraptyń sholýdy ótkizýge daıyndyǵyn oń baǵalady. Sholý týraly eldik baıandamany daıyndaý úshin sol elge sapar mańyzdy shart bolyp tabylady. Sholýdyń túıindemesin BUU-nyń Esirtki jáne qylmys jónindegi basqarmasy (BUU EQB) daıyndap, Konvensııanyń júzege asyrylý barysyn sholý jónindegi Úkimetaralyq jumys tobynyń kezekti 2014 jylǵy maýsymda ótetin májilisine usynady dep kútilip otyr. Aıta keterligi, elimiz Kon­vensııaǵa 2008 jyly qosylǵan bolatyn. Al sarapshy retinde Pákistan men Katar mamandarynyń kelýi de kezdeısoq emes. 2011 jyly Konvensııanyń júzege asyrylý barysyn sholý jónindegi Úkimetaralyq jumys toby jerebe salǵanda Qazaqstannyń zańnamalaryna sholý júrgizý úshin eki el – Pákistan men Katar anyqtalǵan bolatyn. Qazirgi tańda sholýdyń birinshi – qazaqstandyq taraptyń keshendi baqylaý saýaldamasyna jaýaby men qazaqstandyq sarapshylardyń Pákistan men Katar sarapshylarymen beıne jáne telefondyq konferensııasymen qosa kabınettik sholý jáne ekinshi – Qazaqstannyń memlekettik organdary jáne ÚEU-men kezdesý úshin eldik sapar jasaý kezeńderi aıaqtaldy. Sholýdyń sońǵy, úshinshi kezeńi BUU EQB sholýdyń túıindemesin daıyndap, ony Konvensııanyń júzege asyrylý barysyn sholý jónindegi Úkimetaralyq jumys toby qabyldaǵan kezde aıaqtalady. «Egemen-aqparat».