Almaty qalasynyń salyq qyzmeti ústimizdegi jyldyń birinshi toqsandyq esebin pysyqtady. Jınaqtalǵan derekke saı, jyl basynan beri qala qazanyna túsken 295,2 mıllıard teńgeniń 249,2 mıllıardy salyq qyzmetiniń úlesine tıesili.
Qala ákimi Ahmetjan Esimov Elbasy Nursultan Nazarbaevtyń tapsyrmasy boıynsha eldegi shaǵyn jáne orta bıznesti qoldaý úshin jáne nesıeleý maqsatynda bank júıesin damytý, sondaı-aq, údemeli ındýstrııalyq-ınnovasııalyq damýdyń memlekettik baǵdarlamasyn ilgeri bastyrý úshin Ulttyq bankten qarjy bólinetinin aıta kelip, Almaty qalasynyń qarjylyq áleýetine toqtalyp ótti.
«Almaty qalasy iskerlik pen kásipkerliktiń qaınaǵan kózi retinde memleket tarapynan qarastyrylǵan qarjynyń belgili bir bólshegi keleshekte bizdiń qalamyzǵa bólinetinin eskergen jón. Sondyqtan da, Ulttyq qordan qarastyrylyp otyrǵan qarajat el ekonomıkasyna qyzmet etip, jańa jumys oryndaryn ashý men salyqty ýaqytyly tóleý arqyly memlekettiń qazanyna ornymen qaıtarylýy tıis. Almaty qalasy boıynsha salyq qyzmetiniń aldyna qoıylǵan meje – 1,5 trıllıon teńge, dittegen ýaqytta oryndalýy kerek», dedi qala ákimi A.Esimov.
Qala ekonomıkasyn damytý tásilderin tilge tıek etken qala basshysy salyq qyzmetiniń sapasyn arttyrýǵa nazar aýdartty. Onyń aıtýynsha, qaladaǵy páterin jalǵa berýshiler men bazarlarda saýda jasaýshylar, kóshelerdegi jarnama taqtaıshalary men TMD elderinen keletin jumys kúshin zańdastyrýǵa jáne salyq tóleýge jumyldyrý kerek.
Qanat ESKENDIR,
«Egemen Qazaqstan».
ALMATY.