Pogodın atyndaǵy orys drama teatrynda aýdan, aýyldyq okrýg ákimderiniń, agroqurylym, vedomostvo basshylarynyń, ınvestorlar men fırma ókilderiniń jáne Reseımen shekaralas aımaqtaǵy Qorǵan, Omby oblystary ǵalymdarynyń qatysýymen kóktemgi dala jumystaryn uıymshyldyqpen ótkizýge arnalǵan aýyl sharýashylyǵy qyzmetkerleriniń semınar-keńesi ótip, ózara tájirıbe almasty. Jıynǵa qatysýshylar aýyl sharýashylyǵy kórmesin tamashalap, zamanaýı tehnıkalar úlgilerimen tanysty.
Alqaly basqosýdy aımaq basshysy Samat Eskendirov ashyp, agroónerkásip keshenin damytýǵa arnalǵan «Agrobıznes-2020» baǵdarlamasyn oryndaý jolyndaǵy mindetterge toqtalyp, Úkimet tarapynan eginshilerdi qoldaý dáıekti jalǵastyrylatynyn jetkizdi.
Oblys ákiminiń birinshi orynbasary Aıdarbek Saparov jerge dán sińirý naýqanyn uıymshyldyqpen atqarý sharalaryn baıandap berdi. Bıyl egistik alqaby 4,3 mıllıon gektardy qurasa, 3,8 mıllıon gektaryna dándi daqyldar sebý josparlanǵan. 520 myń tonna tuqym daıyndalǵan. Kóktemgi egiske 14500 traktor, 16500 seıalka, 1100 sebý kesheni, 2 myńǵa jýyq avtomobıl qatysatyn bolady. 71 myń tonna dızel otynynyń 11 myń tonna benzınniń, 3,2 myń tonna motor maıynyń úshten biri jeńildetilgen baǵamen bosatylyp, sharýashylyqtarǵa jóneltilgen.
Sibir ǵylymı-zertteý ınstıtýtynyń bas dırektory Ivan Hromsov, Soltústik Qazaqstan mal jáne ósimdik sharýashylyǵy ǵylymı-zertteý ınstıtýtynyń bólim meńgerýshisi Vladımır Meshetıch, «Baraev atyndaǵy astyq sharýashylyǵy ǵylymı-óndiristik ortalyǵynyń basshysy Jeksenbaı Qasqyrbaev, Sibir tájirıbe stansasynyń jetekshisi Ivan Loshkomoınıkov, «Taıynsha-Astyq» JShS dırektory Anatolıı Rafalskıı, taǵy basqalary dándi, maıly, jemshóp daqyldaryn egý erekshelikteri, resýrs únemdeý tehnologııasyn jetildirý jaıly oılarymen bólisti.
О́mir ESQALI,
«Egemen Qazaqstan».
Soltústik Qazaqstan oblysy.