Ákimshilik rásimdik-prosessýaldyq kodeks engizilgen sátten bastap keıingi eki jylda memlekettik organdardyń is-áreketterine baılanysty bıznestiń talap-aryzdarynyń qanaǵattandyrylýy aıtarlyqtaı ulǵaıdy. Qaralǵan 3 myńǵa jýyq istiń 50%-dan astamy bıznestiń paıdasyna sheshildi.
«Atameken» Jańa Qazaqstandaǵy ınvestısııalyq ahýaldy jaqsartý maqsatynda bıznesti qorǵaý úshin ekojúıe qurýdy usyndy. Sondaı-aq ekonomıkalyq qylmystar boıynsha múlikke tyıym salý men zattaı aıǵaqtardy alyp qoıýdyń erekshe tártibin qarastyrý kerektigin aıttyq. Buǵan qosa bıznes sýbektilerin zańsyz qylmystyq jaýapqa tartýdyń nátıjesinde keltirilgen shyǵyndardy óteýdiń biryńǵaı tetigin ázirleýdi, onyń ishinde iskerlik bedeldiń tómendegeni men jiberilgen tabystyń ornyn toltyrý, sol sekildi bızneske nuqsan keltirgen laýazymdy tulǵalardyń qylmystyq-tártiptik, múliktik jaýapkershiligin kúsheıtý usynyldy.
Byltyr «Atamekenge» bıznesti qorǵaýǵa baılanysty 4 myńnan artyq ótinish túsip, onyń 40%-y oń sheshimin tapty. Quqyqtyq statıstıka derekterine súıensek, memlekettik organdarǵa bıznes ókilderi tarapynan dál osy kólemge taıaý ótinishter kelip túsedi. Onyń deni laýazymdy tulǵalardyń áreketterine baılanysty.
Azamattyq sottarda jyl saıyn memlekettik organdardyń is-áreketterine qatysty 9 myńǵa jýyq daýly aryz qaralady. Ulttyq palataǵa túsetin ótinishter kórsetkendeı, kóbinese jer qatynastary, satyp alý, salyq, qurylys salalaryna baılanysty shaǵym kóp.
Nurlan SAKÝOV,
«Atameken» UKP basqarma tóraǵasynyń orynbasary