Kóligimen úsh adamdy qaǵyp, ile izin jasyrmaq bolǵan Batys Qazaqstan oblysy Terekti aýdany ákiminiń burynǵy orynbasary Abzal Birálıev ákimshilik jaýapkershilikke tartyldy. Bul týraly «QazAqparat» habarlady.
Batys Qazaqstan oblysy ishki ister departamenti ákimshilik basqarmasynyń taratqan málimetine qaraǵanda, kinálige úsh jábirlenýshi de keshirim bergen. Olar sot-medısınalyq saraptamadan ótýden bas tartyp, ózderiniń Birálıevke qoıar eshqandaı talaptary joq ekenin jetkizgen. Kólikke qaǵylǵan úsheýdiń biri – 9 jasar bala eken.
Jábirlenýshilerdiń jumsaq kóńiliniń arqasynda A.Birálıev QR Ákimshilik quqyqbuzýshylyq kodeksiniń 467-baby 3-bólimi jáne 469-baby boıynsha ákimshilik jaýapkershilikke tartyldy. Bul baptarda kólikti mas kúıinde basqarý, jol-kólik oqıǵasyn jasaý jáne jol-kólik oqıǵasy bolǵan jerden boı jasyrý sekildi máseleler qaralatynyn eskerte keteıik.
Esterińizge salsaq, A.Birálıev 6 sáýir kúni «Toıota Kamrı 50» markaly kóligin mas kúıinde basqaryp, sonyń kesirinen úsh birdeı adamdy qaǵyp ketken-di. Osy oqıǵadan keıin ol «Nur Otan» partııasy qatarynan shyǵarylyp ári jáne qyzmetinen bosaǵan.
Joldybaı Bazar.
Derekkóz: «QazAqparat».
Foto: Tengrinews.kz.