О́skemendegi óner mýzeıinde belgili sýretshi, Qazaqstannyń eńbek sińirgen qaıratkeri Alpysbaı Qazyǵulovtyń «Ýaqyt sáýlesi» atty jeke kórmesi ashyldy. Býyrqanǵan boıaýlary úndesip, ult dástúrimen tildesip jatqan kartınalary Jerar Deparde, Patrısııa Kaas syndy álemdik deńgeıdegi óner juldyzdarynyń jeke kolleksııalarynda saqtalǵan.
A.Qazyǵulov – Japonııa, Belgııa, Túrkııa, Qytaı, Ulybrıtanııa sııaqty damyǵan elderdegi kórmelerge qatysyp, qazaqtyń salt-dástúrin, tarıhyn nasıhattap júrgen birden-bir sýretshi. Alpysbaı Naǵymetuly syndy qylqalam sheberleriniń kórmesin ótkizý – ár mýzeı úshin úlken mártebe.
Kórmeniń ashylý saltanaty aldynda mýzeı qabyrǵasynda baspasóz máslıhaty ótip, sýretshi ómiri men óneri týraly az-maz syr shertken. Alpysbaı Naǵmetuly Abaı atyndaǵy qazaq pedagogıkalyq ınstıtýtynyń kórkemsýret-grafıka fakýltetinde bilim alǵan, 8 myńǵa jýyq stanoktyq keskindeme jumystardyń avtory. Sýretshi klassıkalyq maıly boıaý tehnıkasymen 200-300 kartınalar serııasyn jazǵan.
– 45 jyldan beri bizdiń áýlet qazaq sýret ónerin jınaýmen aınalysamyz. Kolleksııamyzdaǵy sýretterdiń eń qundysy – Ábilhan Qasteevtiń kartınalary. Onyń tórt shyǵarmasy qorymyzda bar. Al búgingi kórmege eń tańdaýly degen 27 jumysymdy ákeldim. Onyń bireýin mýzeıge syıǵa tartamyn, – dedi sýretshi jýrnalısterge bergen suhbatynda.
Sýretshiniń kenep betine jaqqan boıaýlary erekshe kóz tartady. Sýyq jáne jyly tústi boıaýlardy oınata biledi. Oınata otyryp, tarıhı janrdyń ózin jaınatyp jiberdi. Iá, qaınaǵan tirshilik, jaınaǵan kartına. Ár polotnosynan qazaq dalasynyń ıisi ańqıdy. Atap aıtar bolsaq, «Kókpar», «Han saıatshylyǵy», abstraksııadan «Ǵarysh oıyny» jáne peızaj janrynan «Serýen», «Sharyn shatqalyna saıahat», «Salt atty» sekildi týyndylaryn kóre alasyzdar. Sýretterdiń kóbi – stanoktyq formattaǵy týyndylar.
«Ýaqyt sáýlesi» atty bul kórmede óńir sýretshileriniń de basy birikti. Mýzeıdiń tórgi zalyna qoıylǵan kartınalarǵa tańdana, tamsana qarasty. Únsiz ǵana bastaryn shaıqaıdy. Bilemin, A.Qazyǵulovtyń boıaý jaǵý stıli olardy shyn shabyttandyrdy. О́ıtkeni ár sýretke uzaq qarady.
– Avtordyń kartınalarymen tanyspyn. Biraq mundaı kórmeden tuńǵysh kórýim. Sózben aıtyp jetkize almastaı áser aldym. Úndesip jatqan boıaýlarymen tildesip qaıtqandaımyn. Úıge bara sala kenep kerip, boıaý ezetin shyǵarmyn, – deıdi semeılik sýretshi Marjan Baqytbekova.
Ras, A.Qazyǵulovtyń kórmesi Shyǵys Qazaqstanda tuńǵysh ret ótip jatyr. Mýzeı basshylyǵynyń aıtýynsha, kórme 19 maýsymǵa deıin bolady. О́ner shańyraǵynyń esigi ónerdi qasıet tutatyn ár kórermen úshin árqashan ashyq.
Shyǵys Qazaqstan oblysy