Aýyl balalaryna arnalǵan «Myń bala» olımpıadasynyń nátıjesi shyqty. 150 myńnan asa oqýshy olımpıadada baq synaýǵa ótinim bergen. Jeńimpazdar respýblıkalyq mańyzy bar mamandandyrylǵan mektepterge konkýrssyz qabyldana alady.
Elbasy akademııasy olımpıadanyń qorytyndysyna qatysty baspasóz jıynyn ótkizdi. Brıfıngte sóz alǵan Bilim jáne ǵylym mınıstrligi janyndaǵy Mektepke deıingi jáne orta bilim berý komıtetiniń bas sarapshysy Marat Súleımenov:
– Bizdiń vedomstvo Elbasy akademııasymen birlese otyryp, 3 jyl qatarynan aýyl balalarynyń arasynda «Myń bala» ulttyq zııatkerlik olımpıadasyn ótkizip otyr. Bıylǵy bilim báıgesi sátti, nátıjeli uıymdastyryldy. Saıys negizinen aýyldyq jerlerdegi daryndy balalardy anyqtap, olarǵa qoldaý kórsetýdi kózdeıdi. Bıylǵy jarystyń ereksheligi – óte kóp oqýshy qatysqanynda. «Myń bala» olımpıadasy eki kezeńnen turady. Birinshi kezeń logıkalyq oılaýdy baǵalaýǵa arnalǵan tapsyrmalardy qamtydy. Eń joǵary qorytyndy ball jınaǵan 5 myń oqýshy olımpıadanyń ekinshi kezeńine joldama aldy. Sonyń ishinen iriktelgen 1 myń daryndy bala úzdik dep tanyldy. Onyń 500-i – 5-synyptyń, 500-i – 6-synyptyń oqýshylary. 6-synypty bitirgen jeńimpazdar mamandandyrylǵan bilim berý uıymdaryna konkýrssyz túsýge joldama aldy, – dedi.
Mınıstrlik ókiliniń aıtýynsha, jyldan-jylǵa óńirlerdiń belsendiligi artyp keledi. Bıylǵy nátıjeler boıynsha Qyzylorda, Almaty, Batys Qazaqstan oblystarynan qatysý deńgeıi óte joǵary.
«Elbasy akademııasy» korporatıvtik qorynyń basqarýshy dırektory Alına Hamatdınova ınternettiń sapasyna qatysty shaǵymdar, ótinishter kóp túskenin jetkizdi.
– Testileý qatysýshynyń oqytý tilinde, ıaǵnı qazaq jáne orys tilderinde boldy. Olımpıadanyń birinshi kezeńi óńirlerdegi kestege sáıkes onlaın rejimde ótti. О́ńirlerdiń 40 paıyzy ınternetpen qamtylmaǵanyn bilemiz, ınternet bolǵan kúnniń ózinde sapasy nashar. Sondyqtan bir kúnde 10 bala ǵana tapsyra alatyndaı arnaıy keste jasadyq. О́ıtkeni byltyr barlyq óńirden bir ýaqytta júıege kirgende, qatysýshylar jyldamdyǵy baıaý ınternettiń kesirinen onlaın tapsyrmadan óte almaı qınaldy. Táýlik boıy jumys isteıtin sall-ortalyǵymyzǵa Almaty, Mańǵystaý, Túrkistan oblystaryndaǵy ınternettiń sapasyna qatysty shaǵymdar jıi tústi. Bul aqparatty tıisti mınıstrlikke beremiz, – dedi A.Hamatdınova.
Qor dırektorynyń málimdeýinshe, Jambyl oblysynyń oqýshysy upaı sany boıynsha eń jaqsy nátıje kórsetti. Ekinshi orynda Qaraǵandy oblysynyń balasy jáne úshinshi orynda Soltústik Qazaqstan oblysynyń qatysýshysy tur. Jeńimpazdardyń biri – Elnar Qojahmet Aqmola oblysyndaǵy №2 Qosshy orta mektebiniń 6-synybynda oqıdy. Ol atalǵan baıqaýǵa 5-synypta da qatysypty.
– Ár jyly jas ereksheligimizge, deńgeıimizge qaraı tapsyrma berildi. Pánderdiń ishinde matematıka qıyndaý, onda logıkalyq esepter biraz oılanýdy qajet etedi. Degenmen jaýap tabýǵa bolady. Bolashaqta sánger bolǵym keledi. Oǵan da matematıka kerek, sebebi kıimdi pishkende ólsheýge, tabysty sanaýǵa, qajetti ýaqytty esepteýge matematıkalyq daǵdy ǵana kómektese alady. «Myń bala» olımpıadasynda aǵylshyn tilinen de test tapsyramyz. Menińshe, aǵylshyn tili – barlyq mamanǵa kerekti pán. Mysaly, maǵan sheteldegi sángerlerdiń jumysyn kórip, tanysýǵa, saıahattaýǵa qajet bolady. 130 myńnan asa adamnyń ishinen jeńip shyǵý úshin qatysýshyǵa arman, maqsat, tabandylyq kerek. Men, mysaly, osy olımpıadaǵa myqty mektepterdiń birine túsý úshin qatystym, – deıdi E.Qojahmet.