Qazaqstanda memlekettik organdarda personaldy basqarý júıesin avtomattandyrýda Nıderlandynyń P-Direkt kompanııasynyń tájirıbesi paıdalanylatyn bolady. Bul týraly egemen.kz tilshisi habarlady.
Munyń jaıy búgin, 17 sáýir kúni Astanada «Memlekettik qyzmet sektorynda adamı resýrstardy basqarýdyń avtomattandyrylǵan júıeleri» taqyrybynda ótken semınar barysynda belgili boldy. Memlekettik qyzmet isteri agenttigi men Eýropa odaǵy «Qazaqstan úkimeti memlekettik qyzmet reformasy jáne modernızasııasy» jobasynyń qoldaýymen ótkizilgen semınarda agenttik tóraǵasy Álıhan Báımenov osynyń jayn sóz etti.
«Memlekettik qyzmette zamanaýı tehnologııalardy paıdalanýda bizdiń elimiz álemdegi ozyq tájirıbelerdi zerdeleýde. Bul rette Nıderlandy úkimeti eń aldyńǵy orynda. Sol sebepten de, bizdiń mamandarymyz Nıderlandyǵa baryp, P-Direkt memlekettik kompanııasynyń jumysyn zerttep, mine búgin barlyq mınıstrlikterdiń personaldy basqarý qyzmetteriniń ókilderin jınap, memlekettik organdarda osy «e-qyzmet» júıesi qalaı damýy kerek, ol ne beredi, qandaı artyqshylyqtary bar degen baǵytta semınar ótkizdik» dedi Álıhan Báımenov.
Memlekettik qyzmette adam resýrstaryn únemdep, olardy mazmundy jumysqa baǵyttaýǵa múmkindik beretin «e-qyzmet» jobasyn engizýdiń daıyndyq jumystary elimizde osydan 3 jyl buryn qolǵa alynǵan bolatyn. Qazirgi kezeńde negizgi daıyndyqtyń sońǵy kezeńi ótýde, al 2015 jyldan bastap, pılottyq rejimde osy qyzmet ene bastaıdy.
Anar Tóleýhanqyzy.
Derekkóz: egemen.kz.
Foto: QazAqparat.