El Prezıdenti Qasym-Jomart Toqaevtyń tapsyrmasy boıynsha bıyl «Balalar jyly» dep jarııalanýyna oraı, Jambyl oblysynda túrli is-sharalar uıymdastyrylýda.
О́ńirde túrli olımpıadalyq oıyndar, óner jarysy men zııatkerlik kezdesýler ótýde. Sondaı-aq Áýlıeata óńiriniń ishki týrıstik áleýetin damytý ári tıimdi jobalardy júzege asyrý maqsatynda oblystyq týrızm basqarmasy Taraz qalasynyń turǵyndary men qonaqtaryna arnalǵan ekskýrsııalyq týr uıymdastyrdy. Endi týr aıasynda tarazdyqtar tórt aı boıy kóne shahardyń tarıhı-mádenı oshaqtaryna saıahat jasaıdy. Olar eki myń jyldan astam tarıhy bar Taraz qalasynyń kórnekti jerlerine barady.
Taraz qalasynyń ózinde tarıhı-mádenı eskertkishter men kıeli oryndar jetkilikti. Bul oraıda óńirge kelýshi týrıster de kóne shahardyń tarıhyna erekshe qyzyǵýshylyq tanytýda. Al atalǵan is-sharaǵa arnaıy ekskýrsııalyq avtobýs uıymdastyrylyp, kelýshiler qaladaǵy «Kóne Taraz» tarıhı-arheologııalyq saıabaǵy, «Qarahan», «Dáýitbek», «Aısha bıbi», «Babadja hatýn» keseneleri, Erte Islam dáýirindegi jerasty meshiti, «Tekturmas» etnotarıhı kesheni jáne «Qazaq handyǵy» monýmenti sııaqty tarıhı-mádenı oryndarǵa saıahat jasaýda. Bul saıahattan múmkindigi shekteýli jáne ata-anasynyń qamqorlyǵynsyz qalǵan balalar da tys qalmady. Olardyń qalany erkin aralaýyna eriktiler de kómek kórsetýde. Sondaı-aq ekskýrsııa aıasynda týrızm salasynda eńbek etip júrgen mamandar men balalar arasynda ashyq dıalog órbidi. Mamandar balalarǵa Taraz jerindegi tarıhı qundylyqtar jóninde tolyq málimet berip, san ǵasyrlar boıy jasap kele jatqan tarıhı qundylyqtardy qasterleý ár azamattyń boryshy ekenin jetkizdi. Aldaǵy ýaqytta da óńirdegi balalar úshin mundaı is-sharalar jalǵasyn tabady.
Jambyl oblysy