Qazaq – áý bastan jetim kórse jebeı júrip, jesirin eleýsiz qaldyrmaǵan tekti halyq. Qazirgi ýaqytta ata-anasyz qalǵan balalar men áleýmettik qıyndyqqa tap bolǵan sábıler memleket qorǵaýyna alynǵan. Olarǵa mahabbat pen meıirim ekken balalar úıiniń biri – Aqkól qalasyndaǵy №1 balalar úıi.
Bul mekemede balalar sany – 88, onyń ishinde jetim balalar sany – 14, ata-anasynyń qamqorlyǵynsyz qalǵan balalar sany – 74. Bir qýanarlyq jaıt, balalar úıine keletin balalardyń sany jyl saıyn kemip keledi. Máselen, 2019 jyly balalar úıine kelip túsken balalar 83 bolsa, 2020 jyly bul kórsetkish 28-ge azaıyp 55 bala qabyldanǵan, al 2021 jyly balalar úıine 43 bala kelgen.
Mekeme dırektory Botagóz Qazbekova balalar úıindegi balalardyń deni ata-anasynyń qamqorlyǵynsyz qalǵany úshin osynda kelgenin málimdedi. Iаǵnı olar áleýmettik jetimder tobyna jatady. Nege bul úrdis beleń alyp barady? Ata-analardyń bezbúırek bolyp ketkeni me? Álde maskúnemdikke salyný men turmys tapshylyǵy ma? Elimizdegi mamandardyń aıtýy boıynsha, balalar úıine balalar asyraýshysynan aıyrylýy, ıaǵnı ata-anasynyń ómirden ótip, qaraýsyz qalýyna baılanysty jáne ata-anasynyń óz erkimen baladan bas tartýy nemese ata-ana quqyǵynan shektelýi sebepti balalar úıine ornalastyrylady. Al balalardyń ata-anasynyń qamqorlyǵynsyz qalýyna ákelip soǵar taǵy bir jaǵdaı – keıbir jas analar ómirdegi qıyndyqtardan qorqyp baladan teris aınalýy sebepti jáne otbasynda múmkindigi shekteýli (erekshe balalardyń) balalardyń qoǵam múshesi bolyp, bolashaqta aıaqqa turyp ketýine kúmánmen qaraýy saldarynan bolyp otyr.
Aqkól qalalyq balalar úıinen shyqqan túlekter elimizdiń ǵana emes, Reseıdiń joǵary oqý oryndarynda oqyp, bilimin jetildirgen. Ozat túlektiń biri – Maıra Davydova. 1992-2003 jyldary balalar úıinde tárbıelengen Maıra áýeli Tomskidegi polıtehnıkalyq ýnıversıtette ıadrolyq fızıka jáne tehnologııa mamandyǵy boıynsha bilim alady. 2009 jyly Reseıdiń ǵylymı-zertteý ınstıtýtynyń ishindegi ıadrolyq ortalyqtyń qyzmetkeri bolyp eńbek etedi. 2008 jyly otaý quryp, búginde úsh balanyń anasy atanyp otyr.
Maıra óz sózinde: «Balalar úıiniń meıirban alaqanyna sheksiz alǵysymdy bildiremin. Kóptegen balanyń taǵdyry – sizderdiń qoldaryńyzda. Taǵdyr tálkegine túsken balalardyń ómirin jeńildetip, baqytqa bóleý úshin óz júrekterińizden meıirim men parasattylyq otyn aqtara bilgenderińiz úshin alǵys aıtamyn», degen bolatyn.
Al balalar úıinen qanat qaǵyp, joǵary oqý ornyn bitirip, búginde eki balanyń anasy bolyp otyrǵan Aıgúl Dúısembaeva aǵynan jaryla: «Ata-anasyz, týǵan týyssyz ómir súrsem de, balalar úıinde bul olqylyqty sezingen emespin. Balalar úıinde bolǵan ár adamnan sabaq ala bildim. О́mirde jetistikke jetý úshin kóp eńbek etý kerek ekenin túsindim. Eshqashan basqa jannan daıyn zatty kútýge bolmaıdy. Eńbek, eńbek jáne eńbek. Qaýipsizdik pen mahabbatty sezindirgeni úshin bizdiń balalar úıiniń ujymyna úlken alǵys aıtamyn», dedi.
Balalar úıinde jetkinshekter bolashaqqa erkin qanat qaǵýy úshin barlyq jaǵdaı jasalǵan. Ártúrli sporttyq oıyn alańdary men balalardyń zeıini ashylýy úshin kitaphana qyzmet kórsetip otyr. Ár balanyń taǵdyryna jeke-jeke nazar salyp, búginnen erteńge joldama bergen meıirim ordasy aldaǵy ýaqytta da qajyrly eńbegimen alǵa adymdaı bereri sózsiz.