Iá, qysqy sport túrlerinen esemiz ketip-aq júr. Kúni keshe Aspanasty elindegi Qysqy Olımpıadadan qorjynymyz bos qaıtty. Týrınnen de bos qaıtqan edi. Eger Denıs Ten bolmaǵanda basymyz salbyrap, Sochıden de qurqol oralatynymyz anyq-tyn. Qysqasy, qysqy sporttyń qyzyǵynan shyjyǵy basym bolyp turǵany belgili.
Elimiz qysqy sport túrlerinen qarjy aıaǵan emes. Biraq alǵa basý degen múldem baıqalmaıdy. Qazaqstandaǵy qysqy sport túrleri boıynsha jalǵyz sport mektep-ınternatynda bolǵanymyzda, osy másele mazalaǵan edi.
Pandemııaǵa baılanysty qysqy sport túrlerinen sportshylar daıyndaıtyn Rıdderdegi sport mektebine aıaq baspaǵaly eki jyl óte shyǵypty. Jan-jaǵyn qaraǵaı, shyrsha, qaıyń aǵashtary qorshaǵan mektep-ınternat ornalasqan jerdiń tabıǵaty ǵajap. Oqýshylardyń alańsyz jattyǵýyna barlyq jaǵdaı jasalǵan. Munda shákirtterge bes mezgil taǵam beriledi. Qunarly dárýmendi qospalar óz aldyna. Oqý ornynyń maqsaty – elimizdiń qurama komandasyna kandıdattar daıyndaý, Qazaq eli sportshylarynyń básekege qabilettigin arttyrý.
Atalǵan oqý ornynyń basshysy kıkbokstan álemniń bes dúrkin chempıony, memlekettik qyzmette shyńdalǵan Qazaqstannyń eńbek sińirgen jattyqtyrýshysy Asqar Mojanov ekenin aıta keteıik. Ol aldymen bizdi aýmaǵy ondaǵan gektar jerdi alyp jatqan oqý ornynyń josparlarymen tanystyrdy. «О́kinishke qaraı, 2018 jyly bastalyp, eki jyldan keıin paıdalanýǵa beriledi dep belgilengen jańa oqý korpýsynyń qurylysy aıaqsyz qaldy. Sebebi kezinde qurylysqa jaýapty eki adam memlekettiń mıllıondaǵan teńgesin qulqyndarynan ótkizip jibergen. Kináliler jazasyn alǵanymen, amal bar ma, shákirtterge qolaısyz jaǵdaı týǵyzdy. Burynǵy bes qabatty korpýsta syǵylysyp sabaqtaryn oqıdy, ashyq aspan astynda jattyǵady. Buǵan shydaýdan basqa amal joq. Eger Mádenıet jáne sport mınıstrliginiń basshylary qarjy kózin taýyp, qurylysty aıaqtaýǵa qolǵabys jasasa, alǵystan basqa aıtarymyz joq», deıdi Asqar Baıjigituly.
Qysqy sport túrlerinen ketip júrgen esemizdi qaıtaramyz desek, erteń el namysyn abyroımen qorǵaıtyn balǵyn sportshylardy daıyndaý máselesine basa mán berýimiz asa kerek-aq!
Ońdasyn ELÝBAI,
Qazaqstannyń qurmetti sport qyzmetkeri
Shyǵys Qazaqstan oblysy,
Rıdder qalasy