Qazaqstan tarıhynyń ajyramas bóligi sanalatyn ár aımaqtyń tarıhyn zerttep-zerdeleýdiń mańyzy zor. Bul rette jastar týǵan eline, jerine adal qyzmet etken tulǵalardyń ómirin úlgi tutýǵa mindetti. Sondaı tulǵalardyń biri – Qazanǵap bı Satybaldyuly.
Qazanǵap Satybaldyuly (1771-1856 jj.) – qazaqtyń ataqty batyry Malaısarynyń úzeńgiles dosy Baıdáýlet batyrdyń shóberesi (keıbir derekter boıynsha – nemeresi), Básentıin eliniń tóbe bıi. Ataqonysy – Pavlodar oblysyna qarasty osy kúngi Jolqudyq aýylynyń mańyndaǵy Rebrovka degen eldi meken, qystaýy Ertis pen Aqsý ózeni boıyndaǵy jerler, al jaz jaılaýy Ekibastuz-Qalqaman alqabyndaǵy qyr men «Aqkól-Jaıylmaǵa» jaqyn «Shuryq», «Saryqamys» degen ózenderdiń boıynda.
Qazanǵap Satybaldyulynyń sheshen, saıası qaıratker ǵana emes, sonymen qatar mal sharýashylyǵy men egin sharýashylyǵymen de aınalysqan iri kásipker hám halyqqa janashyr, demeýshi bolǵanyn tarıhı derekter aıǵaqtaıdy. Qazanǵap Satybaldyuly qazirgi Pavlodar oblysynyń Lenın kentinde medrese salǵyzyp, qazaq jastarynyń bilim alýyna qolǵabys tıgizgen eken.
Aıtpaǵym, Qazanǵap bıdiń Kereký-Baıanaýyl óńiriniń damýyna, kórkeıýine eńbegi sińgenin eskerip, halqyna adal qyzmet etken azamattyń esimin halyq jadynda máńgilikke saqtap qalý úshin, ataqonysy Ertis ózeniniń sol jaǵyndaǵy Pavlodar oblysynyń Aqsý aýdanyna qarasty jerler (sonyń ishinde Lenın kenti) bolǵanyn eskere otyryp, Lenın kentine Qazanǵap bı Satybaldyulynyń esimi berilse, búgingi urpaqtarynyń babalary aldyndaǵy bir paryzy oryndalǵan bolar edi.
Mahmet DEMESINOV,
Pavlodar qalasynyń Qurmetti azamaty