Taǵattylyq – tańdaýymyz

Keshe Qazaqstan Respýblıkasy Tuńǵysh Prezıdentiniń murajaıynda Memlekettik hatshy Ádilbek Jaqsybekovtiń qatysýymen Qazaqstan halqy Assambleıasynyń keńeıtilgen májilisi bolyp ótti. Bul – búgin bolatyn QHA HHI sessııanyń aldyndaǵy eń úlken májilis. Onyń jumysyn Assambleıa Tóra­ǵasynyń orynbasary – Hat­shy­lyq meńgerýshisi Eraly Toǵjanov ashyp, júrgizip otyrdy. О́ziniń kirispe sózinde ol Májiliske Parlament depýtattary, Astana jáne Almaty qalalary men oblystar ákimderi, etnomádenı bir­lestikterdiń jetekshileri, QHA aı­maq­tyq hatshylyǵynyń basshylary, mı­nıstrlikter men vedomstvolar ókil­deri qatysyp otyrǵanyn atap ótti. Sóz kezegi birinshi bolyp Mem­lekettik hatshy Ádilbek Jaqsy­be­kovke berildi. Ol óziniń sózinde Elbasy Nursultan Nazar­baev­tyń tóraǵalyǵymen ótetin «Qazaqstan-2050 Strategııasy: beı­bitshilik, rýhanııat jáne keli­sim mádenıeti» atty Qazaqstan halqy Assambleıasynyń HHI sessııasynyń mańyzy men róline toqtalyp ótti. Osy forýmda beriletin tapsyrmalar kelesi jyly atalyp ótiletin Assambleıanyń 20 jyldyǵy qarsańyndaǵy jumystardyń negizi bolady, dedi ol.  Qoǵamdyq kelisim men el bir­ligi Qazaqstannyń strategııalyq maqsattaryna jetýdiń eń basty sharttarynyń birine aınaldy.  Ol san márte dáleldenip keledi jáne Assambleıa jumysynyń bas­ty maqsaty. Assambleıa jańa jaǵdaılarda jalpyazamattyq saıa­sattan joǵary ári jalpyulttyq ınstıtýtqa aınalyp keledi. Al onyń mıssııasy HHI ǵasyrda keńeıe túsýi qajet, dedi odan ári Memlekettik hatshy. Qazaqstan halqy Assam­bleıa­synyń HH sessııasy ótkennen beri jalpy memlekettik etnosaıasat jáne QHA ınstıtýtyn nyǵaıtý boıynsha úlken jumystar isteldi.  Sonyń ishinde Elbasy N.Nazarbaev «Qazaqstan halqy Assambleıasynyń 2020 jylǵa deıingi kezeńge arnalǵan damý tujyrymdamasyn» bekitti. Bul qujat qurylym jumysynyń bolashaqtaǵy damý baǵyttaryn aıqyndady. Sonymen qatar, aı­maq­tyq erekshelikter men etno-demografııalyq ahýaldy esepke ala otyryp, óńirler­degi Assambleıanyń damý tujy­rym­damasy qabyldandy, deı kelip, odan ári Memlekettik hatshy Astana qalasy, Atyraý, Batys Qazaqstan, Qaraǵandy, Qyzylorda jáne Mańǵystaý oblystarynyń ákimdikterindegi Assambleıany qoldaý jumystaryna toqtalyp, olardaǵy arnaýly Dostyq úıleri qurylysynyń  2015 jylǵa deıin aıaqtalýy kerektigin eskertip ótti. Bul týraly osy aıdyń aıaǵyna deıin aqparat berýleriń kerek, dep Á.Jaqsybekov naqty tapsyrma berdi. Sondaı-aq, Astana men Almaty qalalarynyń ákimderinen aımaqtyq Assambleıanyń jumys­shy organdaryn qajetti kadrlarmen qamtamasyz etýge jáne resýrstarmen nyǵaıtýǵa baǵyttalǵan sharalar qoldanýdy surady. О́ziniń sózinde Memlekettik hat­shy Assambleıa jumysyn aqparat­tyq-saraptamalyq qamsyz­dan­dyrý baǵyty jańa deńgeıge kóte­ril­genin aıtyp ótti. Bul baǵytta óte úlken jáne jan-jaqty jumystar júrgizilýde jáne olar atqarýshylardyń ózara tyǵyz baı­lanysta bolýyn qajet etedi, deı kelip, Á.Jaqsybekov Ǵylymı-saraptamalyq keńes alda bolatyn otyrystarynyń birinde óz áreketterin basqa atqarýshylardyń jumystarymen úılestirý máselesin qarastyrýy kerektigin aıtty. Odan ári sheshen QHA-nyń atqaryp jatqan jumystaryna oń baǵa berip ótti. Qazirgi kezde bul qurylym aqpa­rattyq jáne qoǵamdyq-saıası jumystar boıynsha úlken jobalardy iske asyrýda. Olar Qazaqstannyń barlyq turǵyn­daryn qamtyp otyr. Sonyń ishinde, dedi Memlekettik hatshy, Beı­bitshilik pen kelisimniń jol kartasy eldiń qoǵamdyq-saıası jáne mádenı ómirinde úlken rezonans týdyrǵan jańalyq boldy. QHA-nyń 20 jyldyǵyna oraı bul mega-jobanyń ekinshi kezeńi de bastalyp ketti. Onyń basty ıdeıasy eldiń birligi, kóptúrliligi jáne áleýmettik jaýapkershiligi qaǵıdattaryna negizdelgen. QHA jumysynyń taǵy bir baǵyty partııalararalyq yntymaqtastyqqa baǵyttalǵan. Bul oraıda Assambleıanyń Májilistegi fraksııasy belsendi qyzmetter atqarýda. Sondaı-aq, aımaqtyq máslıhattarda da QHA-nyń múddelerin qoldaıtyn depýtattar toby qalyptasqan. Assambleıanyń osy baǵyttardaǵy jumysynyń eń joǵary nátıjesi retinde eldegi saıası partııalarmen yntymaqtastyq týraly memorandým qabyldaý qol jetkizilgenin atap ótti. Sóıtip, etnosaralyq qatynastardy, ulttyq birlikti saıasılandyrýǵa jol bermeý qaǵıdaty qamtamasyz etildi, dedi Memlekettik hatshy. О́ziniń sózinde Á.Jaqsybekov QHA-nyń 20 jyldyǵyn atap ótý máselelerine de toqtalyp ótti. Osyǵan baılanysty Assambleıa Hatshylyǵyna barlyq etnomádenı birlestikterdiń, aımaqtar ákimderi men tıisti qurylymdardyń osy máselege qatysty usynystary men pikirlerin jınap, olardy qorytý týraly tapsyrma berilgenin atap ótti. Erteńgi bolatyn sessııada aıtylatyn tapsyrmalardy eskerip, olar birtutas josparǵa aınalýy kerek, dedi ol. Sonymen qatar, Memlekettik hatshy 2015-2017 jyldarǵa arnalǵan QHA-nyń damý tujyrymdamasy men Ulttyq birlik doktrınasy da qabyl­dana­tynyn atap ótti. Men bizdiń ju­mysymyzdyń sapalylyǵy Qazaq­standaǵy beıbitshilik pen qo­ǵam­dyq kelisimdi jáne ulttyq birlikti nyǵaıtýǵa qyzmet etetinine senimdimin, dedi ol sóziniń aıaǵynda. Otyrys barysynda óz óńi­rin­degi QHA jumystaryna baılanysty atqarylyp jatqan ister jóninde Shyǵys Qazaqstan oblysynyń ákimi Berdibek Saparbaev sóıledi. Sondaı-aq, vedomstvolar basshylary arasynan Bilim jáne ǵylym mınıstri Aslan Sárinjipov sóılep, QHA-men yntymaqtastyq máselelerine toqtalyp ótti. Al Májilis depýtaty Iýrıı Tımoshenko  Qazaqstan ýkraındary radasynyń jumysy týraly aıtty. Jaqsybaı SAMRAT, «Egemen Qazaqstan».