Senattyń Konstıtýsııalyq zańnama, sot júıesi jáne quqyq qorǵaý organdary komıtetiniń depýtattary keńeıtilgen otyrys ótkizdi, dep habarlaıdy Egemen.kz.
Otyrys barysynda «Qazaqstan Respýblıkasynyń keıbir zańnamalyq aktilerine zııatkerlik menshik jáne memleket kepildik bergen zań kómegin kórsetý salalaryndaǵy zańnamany jetildirý máseleleri boıynsha ózgerister men tolyqtyrýlar engizý týraly» zań jobasy talqylandy.
Komıtet tóraǵasy Vladımır Volkov zań jobasy boıynsha jumys osy saladaǵy zańnamany jetildirýdegi kezekti qadam ekenin atap ótti.
«Zań jobasymen ujymdyq uıymdar qyzmetiniń ashyqtyǵy men tıimdiligin arttyrýǵa, jańa «geografııalyq nusqamalar» obektisin engizýge, tirkelmegen ónerkásip úlgilerin qysqa merzimdi qorǵaýǵa baǵyttalǵan túzetýler men ózgerister usynylyp otyr. Bul jańalyqtar otandyq taýar óndirýshilerdiń qyzmet aıasyn keńeıtýge múmkindik beredi», dedi senator.
Zań jobasy sonymen qatar quqyq ıelenýshilerdi qorǵaýdy kúsheıtýge de baǵyttalǵan. Mysaly, zań jobasymen engiziletin, tirkelmegen ónerkásip úlgilerin qysqa merzimdi qorǵaý týraly ereje senatorlardyń aıtýynsha, quqyq ıelenýshilerdi túpnusqa buıymdardyń syrtqy túrin tikeleı kóshirýden qorǵaýǵa múmkindik beredi. Qujat sondaı-aq memleket kepildik bergen zań kómegine quqyǵy bar tulǵalar tobyn keńeıtýdi kózdeıdi.
Komıtettiń keńeıtilgen otyrysynyń qorytyndysy boıynsha zań jobasyn Palatanyń qaraýyna jiberý týraly sheshim qabyldandy.
Aıana Toǵanbek