Birtýar tulǵa Dinmuhamed Qonaevtyń týǵanyna 110 jyl tolýyna oraı, Sarysý aýdany, Jańatas qalasyna qarasty «Degeres» eldi mekenindegi qazaq orta mektebine qaıratkerdiń esimi berildi. Sondaı-aq bilim oshaǵynyń aldynda Dinmuhamed Qonaev eskertkishiniń ashylý rásimi ótti. Jıynda aýdan ákimi Marat Sultanǵalıev belgili tulǵanyń mereıtoıy qarsańynda bul aýdan halqy úshin qýanyshty jańalyq bolǵanyn jetkizdi.
«Bul mektep buǵan deıin Sáken Seıfýllınniń atymen atalyp kelgen bolatyn. Alaıda bizdiń aýdanda Seıfýllın atyndaǵy mektep ekeý bolǵandyqtan, onyń birine Qonaevtyń esimin berýge usynys berdik. Bul oıymyzdy aýdan turǵyndary da maquldap, bastamamyzǵa oń baǵasyn berdi», dedi aýdan ákimi. Aıtysker aqyn Eset Dosaly arnaý aıtyp, aýdannyń damýy jolynda eńbek etken azamattardyń eńbegin jyrǵa qosty. Al óz sózinde aýdandyq Alqa bıler keńesiniń tóraǵasy Serik Appazov pen Dinmuhamed Qonaev eskertkishiniń boı kóterýine demeýshilik kórsetken kásipker, Sarysý aýdanynyń Qurmetti azamaty, elimizdiń Qurmetti qurylysshysy Dáýletaldy Janbaevqa, aýdan ákimi Marat Sultanǵalıevke jáne músinshi Altaı Beısenovke alǵys aıtty. Sondaı-aq Dáýletaldy Janbaev bıylǵy jyly bul eskertkishpen qatar, birqatar aýyl azamattary birigip, Jańatas qalasyndaǵy «Urpaqtar alleıasy» aýmaǵyna Dinmuhamed Qonaevtyń bıiktigi 5 metrden asatyn eńseli eskertkishin ornatý da josparda bar ekenin jetkizdi. Al oblystyq arnaýly áleýmettik qyzmet kórsetý ortalyǵynyń dırektory Balabek Narbaev, Sarysý aýdanynyń Qurmetti azamattary Lesbek Shaımenuly men Altyn Dosjanova quttyqtaý sóz sóılep, aýdannyń qurylý tarıhy jóninen áńgimeledi. Sondaı-aq osynaý ıgi iske atsalysqan barsha azamattarǵa aq batasyn berdi. Eńseli eskertkishti Basıe Abdrahmanov, Sovet Beıimbetov jáne Tynyshtyq Bektóreeva syndy aýdannyń zııaly qaýym ókilderi saltanatty túrde ashty. Bilim oshaǵynyń aldynan boı kótergen eskertkishtiń bıiktigi 3 metr. Al 784 oqýshyǵa arnalǵan bul mektep 1987 jyly paıdalanýǵa berilgen. Qazirgi tańda munda 756 oqýshy bilim alýda. Mektep dırektory Gúlmıra О́mirbaevanyń aıtýynsha, bıylǵy 34 túlektiń úsheýi «Altyn belgige» úmitker eken.
Budan keıin aýdandyq mádenıet úıinde Dinmuhamed Qonaevtyń týǵanyna 110 jyl tolýyna oraı forým ótti. Ǵylymı keńeske «D.Qonaev atyndaǵy Halyqaralyq qory» oblystyq fılıaly dırektorynyń orynbasary, jýrnalıst Jańabaı Mıllıonov, Halyqaralyq «Alash» ádebı syılyǵynyń laýreaty, jazýshy Kósemáli Sáttibaıuly, D.Qonaev atyndaǵy oblystyq balalar men jasóspirimder kitaphanasy dırektorynyń orynbasary Saılaýbek Lesbaev jáne Talas aýdanyndaǵy D.Qonaev atyndaǵy mýzeıdiń qyzmetkeri Iles Nuruly qatysyp, kórnekti qaıratkerdiń ómiri men qyzmet joly týraly baıandama jasady. Forým barysynda aýdan ákimi Marat Sultanǵalıev jeke qarajatyna D.Qonaevtyń eskertkishin salyp bergen kásipker Dáýletaldy Janbaevqa Alǵys hat tabystap, qurmet kórsetti. Sondaı-aq jýyrda ǵana aýdandyq ishki saıasat bóliminiń uıymdastyrýmen ótken «Shabytymnyń shynary – Dımash ata» atty aýdandyq jyr músháırasynyń jeńimpazdaryn marapattady.
Jambyl oblysy