Tennısten Qazaqstan áıelder quramasynyń kapıtany Iаroslava Shvedova amerıkalyq Vanıa Kıngpen birge «Úlken dýlyǵa» sanatyndaǵy «Ýımbldon» týrnıri aıasynda ótetin Ladies lnvitational Doubles jarysyna qatysady.
Atalǵan dodada sporttyq jolyn aıaqtaǵan oıynshylar óner kórsetedi. «Uzaq úzilisten keıin úlken kortqa qaıta oralatynyma qýanyshtymyn. Ulybrıtanııada Vanıamen kezdesýdi asyǵa kútemin. Endi laıyqty óner kórsetý úshin durystap jattyǵý kerek», deıdi Iа.Shvedova. Aıta keteıik, 2010 jyly Iаroslava men Vanıa 145 jyldyq tarıhy bar «Ýımbldon» básekesiniń juptyq kezeńinde top jarǵan edi. Olar fınalda reseılik Elena Vesnına men Vera Zvonarevadan eki sette – 7:6, 6:2 esebimen basym túsken bolatyn.
Sondaı-aq qazaqstandyq jas tennısshiler Arýjan Saǵyndyqova men Maksım Batıýtenko jastar arasyndaǵy Fransııa ashyq chempıonatynyń irikteý kezeńderinde baq synaıdy. Eki tennısshi de Team Kazakhstan akademııasynyń túlekteri. Jastar arasyndaǵy «Rolan Garros» básekeleri 29 mamyr men 4 maýsym aralyǵynda Parıjde ótedi.