Kóktemgi egiske qoldaý

Kóktemgi egis jumystaryna daıyndyq sheńberinde «QazAgroQarjy» kompanııasyna jalpy somasy 13 mlrd. teńgege 1365 birlik tehnıka satyp alýǵa ótinim kelip tústi. Búgingi tańda sharýagerlermen jalpy quny 3 664 mln. teńgege 479 birlik egis tehnıkasyn satyp alýǵa qarjy lızıngi sharttary jasalyp ta qoıǵan, al endi taǵy da 886 birlik tehnıkaǵa tapsyrylǵan ótinimder kompanııanyń nesıe komıtetinde qaralý ústinde, dep habarlady «QazAgroQarjy» AQ baspasóz hatshysy Álııa Isenova ótken sársenbide. Kópshilikke áıgili tehnıkalardyń arasynda, traktorlar men tuqym sepkishterden basqa, tyrma, kýn, soqa, pishen taılaýshy, qopsytqysh, destelegish jáne t.b. sııaqty tehnıka túrleri de bar. Kóktemgi egis jumystary sheńberinde dıqanshylardyń satyp alatyn tehnıkalarynyń kópshiligi qazaqstandyq óndiristiń jasap shyǵarǵan tehnıkalary, atap aıtqanda, eń áıgili úlgileriniń biri – Semeıdegi «SemAZ» avtoqurastyrý zaý­ytynda qurastyrylǵan «Belarýs» traktory ekenin aıtyp ketken jón. О́z aldyna, tehnıkaǵa arnalǵan aspaly jabdyqtar tek AQSh-tan ǵana emes, sonymen qatar, Reseıden, Belorýssııadan, Ýkraınadan, Kanadadan, Germanııadan da satylyp alynady. Sózdiń reti kelip turǵanda aıta ketý kerek, aýylsharýashylyq taýar óndirýshilerin qoldaý maqsatynda, 2013 jyldan bastap «QazAgroQarjy» AQ aýylsharýashylyq tehnıkasyn satyp alýǵa arnalǵan alǵy tólemdi 25%-dan 15%-ǵa tómendetti. 2014 jyldyń kóktemgi egis jumystaryna daıyndalý sheńberinde kepilzatpen qamtamasyz etýmen birge  alǵy tólem de lızıng zaty qunynyń      15 %-yn quraıdy. Jalpy, «QazAgro» ulttyq basqarýshy holdıngi aǵymdaǵy jyldyń kóktemgi egis jumystaryna 61,6 mlrd. teńge baǵyttaýdy jos­parlap otyr, onyń 40 mlrd. teńgesi bıýdjettik nesıe. Aǵymdaǵy jyly egis jumystaryna nesıeler enshiles kompanııalar arqyly ótken jyldaǵy uqsas nesıelik ónimder boıynsha beriledi. Budan basqa «QazAgro» alǵashqy ret kóktemgi egis jumystaryn ekinshi deńgeıli bankter arqyly qarjylandyratyn bolady. Bul maqstattarǵa bıýdjettik nesıe qarajatynan 20 mlrd. teńge bólindi. Egin egýge arnalǵan nesıelik qarajattyń jańa kózi «Agrobıznes-2020» baǵdarlamasyna sáıkes sharýalardyń qarjylandyrýǵa qoljetimdiligin arttyrý maqsatynda  qosyldy. Jalpy, ulttyq holdıngten egin jumystaryna bólingen qarajat 6,1 mln.ga jer kólemine agrotehnıkalyq sharalardy júrgizýge múmkindik beredi, dep habarlady «QazAgroQarjy» AQ baspasóz hatshysy. Suńǵat ÁLIPBAI, «Egemen Qazaqstan».