Japonııa eki jylǵa sozylǵan pandemııadan keıin sheteldik týrısterdi qaıta qabyldamaq. Kelesi aıda úkimet 98 memleket pen aımaqtan kelgen týrısterge elge kirýge ruqsat beredi. Saıahattaýshylarǵa qandaı talaptar qoıylady?
Kúnshyǵys eliniń bıligi 10 maýsymnan bastap Ulybrıtanııa, AQSh, Fransııa, Ispanııa, Kanada jáne Malaızııa elderimen qosa alǵanda 98 el men aımaqtan týrısterdi qabyldaıtynyn málimdedi. Biraq saıahattaýshylar týrıstik toptardyń quramynda bolýy kerek, sebebi týrıstik maqsatta jalǵyz kelgen adamǵa elge kirýge ruqsat etilmeıdi. Sonymen qatar Japonııa Syrtqy ister mınıstrliginiń málimetinshe, Ulybrıtanııa sekildi elderden kelgen týrıster úsh táýekel sanatyna bólinedi: qyzyl, sary jáne kók. Bul sanattar kelýshilerdiń karantındik sharalardy qaı deńgeıde saqtaıtyndaryn anyqtaıdy. Japonııaǵa barar aldynda barlyq kelýshiler COVID-19-ǵa qarsy teris synaqtan ótýi kerek jáne olardyń kópshiligi kelgennen keıin PTR testti qaıta tapsyrýlary qajet. Degenmen keıbir elderden kelgen tolyq vaksınalanǵan adamdar qosymsha synaqtan, sondaı-aq basqalar úshin talap etiletin úsh kúndik karantınnen bosatylýy múmkin. «Týrıstik operatorlarǵa kelýshilerdiń ámbebap maska kııýi jáne KOVID táýekelderin salystyrmaly túrde tómendetýge arnalǵan ózge de sharalardy saqtaýyn qamtamasyz etý jaýapkershiligi júkteledi», dep habarlady el bıligi.
Japonııa sondaı-aq halyqaralyq reısterdi qabyldaıtyn áýejaılardyń sanyn jetige deıin arttyrady, olardyń qatarynda Okınava prefektýrasynyń ońtústigindegi Naha men Hokkaıdonyń soltústigindegi Sapporo mańynda ornalasqan Jańa Tıtose áýejaılary bar.
Japonııa – COVID-19 indetine qarsy álemde eń qatań sharalardy engizip, osy ýaqytqa deıin jiti ustanǵan elderdiń biri. Keıinge shegerilgen Tokıo-2020 Olımpıadasynan bastap sheteldik kelýshilerge elge kirýge tyıym saldy. Keıin elde turatyn sheteldikter men iskerlik saparmen kelgender úshin shekteýler sál jeńildetildi. Al jaqynda el úkimeti osy jyldyń 1 maýsymynan bastap shetelden kúndelikti kelýshilerdiń sanyn 20 myńǵa deıin arttyrǵanyn málimdedi. Sonymen qatar Premer-mınıstr Fýmıo Kıshıda shekaradaǵy qatań baqylaýdy bosańsytyp, emin-erkin qatynas ornatqysy keletinin aıtty, alaıda qazir elde pandemııa kezinde engizilgen temirdeı tártip saqtaýly.
2019 jyly Japonııa 31,9 mln sheteldik týrısti qabyldady, bul ózge jyldarmen salystyrǵanda rekordtyq kórsetkish bolyp sanalady. El úkimeti munymen toqtamaı kelesi jyly, ıaǵnı 2020 jylǵa 40 mln adamǵa jospar qurdy. Alaıda álemge lezde taraǵan indet saldarynan bul jospar oryndalmaı qaldy. Esesine shekarasyn bekitip, osy ýaqytqa deıin jabyq boldy. Al mundaı shekteýler týrıstik ındýstrııaǵa qatty áser etti. El ekonomıkasynyń negizgi bóligin quraıtyn týrıster aǵyny 2020 jyly 90% qysqardy, týrıstik qyzmet mekemeleri de biraz shyǵynǵa ushyrady.
Úkimettiń 100-ge jýyq elden týrıster qabyldaımyz degen jańalyǵyn týrıstik agenttikter qýana qabyldady. «Japonııanyń shekarasy týrıster úshin eki jyl jabyq bolǵanyna qaramastan, elge kelýshiler tarapynan úlken qyzyǵýshylyqty baıqaımyz. Shekara tolyq ashylǵannan keıin tapsyrystar qyza túsetinine senimdimin», deıdi Intrepid Travel kompanııasynyń basqarýshy dırektory Zına Bencheıh. Al Japan Journeys týrıstik agenttiginiń basqarýshy dırektory Djeıms Grınfıld «Japon úkimeti óte saq», deıdi. «Olar birinshi týrısterdiń ekskýrsııaǵa kelgenin qalap otyr, árıne, biz muny oryndaýǵa daıynbyz. Tutynýshylarymyzdy qýantý úshin jumys isteımiz. Onyń ústine eki jyldan astam ýaqyt tabyssyz otyrdyq, sonyń ornyn toltyrý úshin qoldan kelgenniń bárin jasaımyz», deıdi ol.
P.S. El ekonomıkasyna týrızm ındýstrııasynan keler tabys aıtarlyqtaı azaısa da, osy ýaqytqa deıin týrısterdi kirgizbeı shekarasyn bekem ustap kelgen el Japonııa ǵana. О́zge elder pandemııa órship turǵan kezde de týrısterdi qabyldaýyn toqtatpady. Vaksınalaýdy jaýapkershilikpen qabyldap, halyqtyń barlyǵyn tegin ekpemen der kezinde qamtamasyz etken elderdiń qatarynda da Japonııa aldyńǵy orynda tur. О́zgeden keler kiristi emes, aldymen halqynyń saýlyǵyn oılaǵan memlekettiń bul sheshimi ózgelerge úlgi bolatyny sózsiz.