Memleket basshysy Qasym-Jomart Toqaevtyń «Jańa Qazaqstan: jańarý men jańǵyrý joly» atty Joldaýynda elimizdiń ákimshilik-aýmaqtyq qurylymyndaǵy birqatar ózgeris týraly aıtqan usynystary búginde aıqyn sıpat ala bastady.
Naqtyraq aıtqanda, tıisti Jarlyqqa qol qoıylyp, soǵan sáıkes aldymyzdaǵy maýsym aıynda el kartasynda jańa oblystar paıda bolady. Olardyń qatarynda ortalyǵy Jezqazǵan qalasy bolatyn Ulytaý oblysy da bar.
Atalǵan óńir turǵyndarynyń bul sheshimdi kópten kútkeni ras. Ákimshilik qurylym men aýmaqtyq bólinis áleýmettik-ekonomıkalyq mindetterdi sheshýdi kózdeıdi. Osy oraıda meniń oıymsha, bul ózgeristerge tıisti aımaqtardyń áleýmettik-ekonomıkalyq damýyn jedeldetý, júk aınalymy logıstıkasyn jetildirý, eńbek resýrstarynyń ishki kóshi-qon aǵynyn ońtaılandyrý, demografııalyq úderisterge oń yqpal etý syndy sharapatty sharýalar myqty negiz bola alady.
Jańadan qurylǵan oblystar sııaqty Ulytaý óńiri úshin de bul Jańa Qazaqstannyń erekshe draıveri bola alatyn tarıhı múmkindik dep te aıtýǵa bolady. Osy iste ekonomıkany quraıtyn óndiristik áleýet qana emes, áleýmettik-mádenı sala da óziniń úlken mańyzǵa ıe bolatynyn eskergen jón.
Mysaly, Ulytaý óńiri týrıstik klasterdiń ekinshi tynysyn asha alady dep senimmen aıtýǵa bolady. Tehnıkalyq múmkindiktermen qamtamasyz etilgen, Jezqazǵannyń shetsiz-sheksiz dalasymen úndesken Joshy han tarıhı-mádenı ortalyǵynyń álemdik týrızmniń bir pushpaǵy bolýǵa múmkindigi zor.
Al ǵarysh aılaǵy she?! Ǵylymı jáne tarıhı týrızm úshin qanshama múmkindikterdi ázirge búrkep tur deseńizshi?! Buǵan qosa dál osyndaı múmkindiktiń Abaı oblysyndaǵy Abaı men Shákárim kesheninde de bar ekenin aıtýǵa bolar edi.
Álbette, jańa oblystardyń basshylary men turǵyndary úshin óńirde neni qalaı damytý keregi aıqyndalǵan bolýy kerek degen oıdamyz. Degenmen bizdiń azamattar sol óńirlerdegi otandastarymyzdyń bastamalaryna qyzyǵýshylyq tanytyp, aýyzbirshiligin bildirip, únemi qoldap otyrýlary kerek. Ideıalarmen bólisip, jańa oblystardyń qurylysyna tikeleı at salysyp, olar kóteretin qabyrǵalardyń nyq bolýyna qolushyn sozǵan abzal. Bul – bizdiń bárimizge qatysty qasıetti borysh.
Vılen MOLOTOV-LÝChANSKII,
professor, medısına ǵylymdarynyń doktory,
Qazaqstan halqy Assambleıasynyń múshesi
QARAǴANDY