Ishki ister mınıstrliginiń ókili Shuǵyla Turlybek jol erejelerin jıi buzatyn júrgizýshiler mobıldik qosymsha arqyly anyqtalatynyn habarlady, dep jazady Egemen.kz.
«Jol qozǵalysyn avtomatty qadaǵalaýdyń tıimdiligin arttyrý úshin Ishki ister mınıstriniń tapsyrmasy boıynsha «Qorǵaý – qaýipti júrgizýshi» mobıldik qosymshasy jasaldy. Onda «Sergek» júıesi kameralary men IIM jedel basqarý ortalyqtary qyzmetiniń múmkindikteri biriktirilgen. Mobıldik qosymshaǵa kelip túsken málimetter dereý polısııa qyzmetkerleriniń planshetterine túsedi. Bul jol qozǵalysyn buzǵan avtomobılderdi naqty ýaqyt rejıminde anyqtaýǵa múmkindik beredi», dedi Shuǵyla Turlybek mınıstrlikte ótken baspasóz máslıhatynda.
Onyń aıtýynsha, arnaıy mobıldi qosymshanyń kómegimen jalǵan memlekettik nómirli avtomobılderdi, tehnıkalyq baıqaýdan ótpegen jáne saqtandyrý polısi joq kólik ıelerin anyqtaýǵa, sondaı-aq ákimshilik aıyppuldardy tólemeı júrgen kólik ıelerin izdep tabýǵa bolady.
«Polısııa qyzmetkeri júıe arqyly 10 mınýttyń ishinde 2 nemese odan kóp zańdy buzǵan «qaýipti júrgizýshi» týraly aqparat alyp, dereý shara qabyldaıdy. Mobıldik qosymsha bıyl 19 sáýirden bastap Shymkentte, 25 sáýirden bastap Almaty men Nur-Sultanda engizildi. Atalǵan qalalarda júıe jumys istegen sátten bastap jol qozǵalysy salasynda 26 myńnan astam ákimshilik quqyq buzýshylyq anyqtaldy. Sonymen qatar 1 078 avtokólik ustalyp, aıyp turaǵyna jetkizildi», deıdi ol.
Qazir bul jańashyldyq О́skemen jáne Atyraý qalalarynda engizilgen.
«Máselen, Nur-Sultanda reseılik nómiri bar VAZ 2114 avtokóligi ustaldy, oǵan 4 mıllıon teńgeden astam somaǵa aıyppul salyndy. Shymkent qalasy boıynsha sheteldik tirkeýi bar 1041 avtomobıl ustaldy, olar 4033 ret jol qozǵalysy erejesin buzǵan», deıdi Sh. Turlybek.