Qostanaı qalasyna kireberis kópirge jaqyn ornalasqan «Kanon» jazǵy demalys ornyndaǵy kóldiń tabanynan mamonttyń jartylaı synǵan jaýyryn súıegi tabyldy. Jergilikti ǵalymdar sútqorektilerdiń joıylyp ketken túrine jatatyn janýardyń súıegi ǵylymı mańyzy bar asa qundy dúnıe ekenin aıtyp otyr.
Tobyl ózenine tıip turǵan demalys aýmaǵyndaǵy taıyz kól tartyla-tartyla bıyl múlde qurǵap qalypty. Al jazdyń ystyǵynda shomylatyn tunyq sýy bolmasa, demalýshylardyń bul jerge kelý-kelmeýi ekitalaı. Sondyqtan nysan ıesi Iýrıı Pırogov sý shyǵyp qalar degen úmitpen kóldiń túbin tereńdete bastapty.
– Bul jer buryn qum kareri bolǵan. Sýǵa jetý úshin kóldiń tabanyn qazý kerek boldy. Jumys istep jatqan ekskavatordyń kúregi bir kezde qum astynan úlken súıekti alyp shyqty. Keptirip, tazalap jýyp, ózimizshe zerttep kórip edik, eshbir janýardyń súıegine uqsata almadyq. Sosyn asa iri ejelgi maqulyqtiki bolar dep uıǵardyq. Keıin surastyryp kórip edik, mamandar mamonttyń jaýyryn súıeginiń synyǵy ekenin aıtty, – dedi demalys ornynyń qojaıyny.
Kásipker tosynnan tabylǵan oljasyn oblystyq tarıhı-ólketaný mýzeıine tapsyrmaq. Mýzeıdegi ǵylymı qyzmetkerlerdiń aıtýynsha, mamont súıegi Tobyl ózeniniń arnasymen áldeqaıdan aǵyp kelýi ǵajap emes.
«Biraq aýyr súıekter mamont ólgen jerden uzap ketpeıdi. Al jeńil súıekterin ózen arnasy alysqa aǵyzyp áketedi. Janýardyń jaýyryny salmaqty bolǵandyqtan, mamonttyń qalǵan iri súıekteri de jaqyn mańda jatýy múmkin», deıdi mamandar.
QOSTANAI