Qarqaralyda aktrısa Sholpan Jandarbekovanyń týǵanyna 100 jyl tolýyna oraı halyq teatrlarynyń oblystyq deńgeıdegi baıqaýy uıymdastyryldy. О́ner báıgesinde Atyǵaı Shanın atyndaǵy jergilikti teatr ujymy bas júldeni jeńip aldy.
Atalǵan teatr baıqaýda kórermen men qazylar alqasynyń nazaryna óner qaıratkeri Keńes Jumabekovtiń «Adasqandar» dramasyn usyndy.
Atyǵaı Shanın teatrynyń rejısseri Araılym Qusnıdtenova qoıylym kórermenniń júregine jol taba alǵanyna qýanyshty ekenin jetkizdi.
– Shyǵarmanyń mán-maǵynasy óte tereń jáne oqıǵasynyń jelisi basty keıipkerlerdiń shynaıy sezimderin jan-jaqty ashyp kórsetedi. Álbette, qazylar alqasynyń akterlerimizdiń eńbegin joǵary baǵalaǵanyna qýanyshtymyz. Bul birinshi jeńisimiz emes ári sońǵysy da bolmaýy kerek degen úmittemiz, – deıdi rejısser.
Halyq teatrlarynyń baıqaýynda Ulytaý aýdanynan kelip qatysqan «Keńgir» ujymyna Florıd Býlıakovtyń «Kúıeýge shyqqan kempirler» pesasynyń jelisi boıynsha qoıǵan tragıkomedııasy úshin birinshi júlde berilse, Shet aýdanynyń ortalyǵy Aqsý-Aıýly kentiniń halyq teatry ekinshi orynǵa laıyqty dep tanyldy. О́ner ujymy qazylardyń talqysyna Tynymbaı Nurmaǵanbetovtiń «Tabaldyryǵyńa tabyn» dramasyn usynǵan bolatyn.
Al júldeli úshinshi oryndy Oljas Janaıdarovtyń «Jut» pesasyn sahnalaǵan Qarqaraly aýdanyndaǵy Táttimbet atyndaǵy aýyldyń teatry ıelendi.
Halyq teatrlary baıqaýynyń jeńimpazdary men júldegerleri dıplomdarmen, aqshalaı sertıfıkattarmen jáne arnaıy syılyqtarmen marapattaldy. Sonymen qatar óner ujymdaryn Sholpan Jandarbekovanyń urpaqtary da quttyqtady.
Qaraǵandy oblysy,
Qarqaraly qalasy