«Referendým týraly» Zańǵa sáıkes bıylǵy elimizdegi basty oqıǵaǵa qatysty uıymdastyrý jumystary ashyq túrde júzege asyrylyp jatyr. Bul jónindegi aqparat barshaǵa qoljetimdi. Ortalyq referendým komıssııasy atalǵan is-sharanyń ázirlik barysy týraly azamattardy habardar etip keledi.
Bul týraly Ortalyq referendým komıssııasynyń tóraǵasy Nurlan Ábdirov aıtty. Onyń sózine súıensek, komıssııanyń barlyq otyrysy gıbrıdti formatta, ıaǵnı offlaın ári onlaın rejimde buqaralyq aqparat quraldarynyń qatysýymen ótkizilip keledi. Jıyndar ORK-nyń ınternet resýrsy arqyly kórsetilip, sýrdoaýdarmamen qamtamasyz etilgen. Ár otyrystan keıin BAQ ókilderine brıfıngter ótkizilip, jýrnalısterge tolyq málimet beriledi, deıdi ortalyq ókilderi. Referendýmǵa qatysty qaýlylar, baspasóz habarlamalary men ózge de aqparattyq materıaldar komıssııanyń ınternet resýrsynda ornalastyrylǵan jáne qoljetimdi.
«Aqparattyq vıdeo jáne aýdıo materıaldar, ınternet-bannerler, merzimdi basylymdarǵa arnalǵan modýlder ázirlenip, respýblıkalyq jáne óńirlik BAQ-qa taratylǵan. Osylaısha, komıssııa tarapynan referendýmǵa daıyndyq prosesiniń ashyqtyǵy men jarııalylyǵyn qamtamasyz etý boıynsha barlyq qajetti shara qabyldanyp jatyr», dep naqtylady jaýapty organ ókilderi.
Aqparat jáne qoǵamdyq damý mınıstri Asqar Omarovtyń aıtýynsha, aldaǵy saıası oqıǵaǵa elimizdegi barlyq aqparat quraly jumyldyrylyp, turaqty monıtorıng júrgizilip keledi. Vedomstvo basshysy BAQ-ta jáne áleýmettik jeliler arqyly óńirler boıynsha daýys berý ýchaskelerin izdeýge baılanysty aqparattyq habarlamalar men grafıkalyq ónimder taratylǵanyn jetkizdi.
5 mamyrdan bastap 499 respýblıkalyq jáne óńirlik BAQ-qa, atap aıtqanda 321 gazetke, 47 telearna men 13 ınternet-resýrske baqylaý júrgizildi. Ázirge úgit jumystaryna baılanysty buzýshylyqtar tirkelmepti.
Sıfrlyq damý, ınnovasııalar jáne aeroǵarysh ónerkásibi vıse-mınıstri Áset Turysov «Jeke sáıkestendirý nómiri (JSN) boıynsha daýys berýge arnalǵan ýchaskeni izdeý» servısin ázirleýge qatysty vedomstvonyń atqarǵan jumysy jóninde aıtty. Bul qyzmet Gov.kz/referendum, Referendum.gov.kz jáne Referendum2022.gov.kz aqparattyq platformalarynda usynylǵan. Kez kelgen elimizdiń azamaty JSN arqyly óz daýys berý ýchaskesin taba alady. Ýchaskesi tabylmaǵan jaǵdaıda avtomatty túrde ákimdikterdiń call-ortalyqtarynyń tizimderi kórsetiledi. Mundaı qyzmet túrleri Kaspi.kz jáne Homebank qosymshalarynda da qarastyrylǵan.