Oqytý – mańyzdy, bekitý odan da mańyzdy. Pandemııa kezinde oqýshylar qashyqtan oqımyz dep keıbir taqyryptardy ótkizip alǵan edi. Osyndaı olqylyqtardyń ornyn toltyrý maqsatynda Bilim jáne ǵylym mınıstrligi jazǵy mektepterdiń jumysyn uıymdastyrdy. Qazirdiń ózinde 2 mln-ǵa jýyq bala jazǵy mektepterde bilimin shyńdap júr.
17 maýsymǵa deıin jalǵasady
Jazǵy mekteptegi bilim berý prosesi ádettegideı partada emes, oqýshylarǵa qyzyqty formatta ótedi. Bul týraly Mektepke deıingi jáne orta bilim berý komıtetiniń tóraǵasy Gúlmıra Kárimova: «Pandemııa oqý úderisine jaqsy áser etpegenin jáne mektep oqýshylarynyń keı taqyryptardy tolyq meńgermegenin jaqsy bilemiz. Basqa elderde bul máseleni sheshý úshin oqý jylyn uzartady. Al biz jazǵy mektepter jumysyn uıymdastyrdyq. Jazǵy mektepterde ıkemdi oqý kestesi uıymdastyrylǵan. Ondaǵy sabaqtar ádettegi formatta emes, murajaılarǵa jáne ekskýrsııalarǵa barý túrinde de ótedi. Bul rette jazǵy mektepte oqýshylarǵa baǵa qoıylmaıtynyn, sonymen qatar úı tapsyrmasy berilmeıtinin aıta ketken jón», dedi.
G.Kárimovanyń aıtýynsha, 26 mamyrda jumysyn bastaǵan jazǵy mektepter 17 maýsymǵa deıin jalǵasady. Jazǵy mektepter pandemııadan týǵan bilim salasyndaǵy olqylyqtardyń ornyn toltyrýǵa ǵana emes, bilim sapasyn arttyrý maqsatynda da uıymdastyrylyp otyr.
«Jaz mezgilindegi oqý múmkindiginshe qyzyqty ári mazmundy bolý úshin barlyq jaǵdaı jasalǵan. Keıbir balalardyń repetıtorlarmen aqyly kýrstarǵa baryp, qosymsha bilim alatyny belgili. Osy rette jazǵy mektep – oqýshy men ata-anaǵa berilgen tamasha múmkindik. Onyń ústine muǵalimder óz oqýshylarynyń kúshti jáne álsiz jaǵyn jaqsy biledi. Jazǵy mektep barlyq 1-8 jáne 10-synyp oqýshylary úshin uıymdastyrylady. Degenmen túrli jaǵdaılarǵa baılanysty jazǵy mektepke qatysty sońǵy sheshimdi ata-analar men mektep oqýshylary ózderi qabyldaıdy. Bul jerde birinshi kezekte balanyń múddesin, onyń bolashaǵyn oılaý kerek. Sondyqtan túpkilikti sheshim ata-ananyń qolynda ekenine qaramastan, biz óz tarapymyzdan oqýshylarǵa jazǵy mektepke barýǵa keńes beremiz. О́ıtkeni bul, eń aldymen, balalarǵa qajet», dedi Mektepke deıingi jáne orta bilim berý komıtetiniń tóraǵasy.
Mınıstrliktiń málimdeýinshe, 2 mln-ǵa jýyq bala osy múmkindikti paıdalanyp, jazǵy mektepterde bilimin shyńdap jatyr.
Áleýmettik sanattaǵylarǵa tegin
Iá, Bilim jáne ǵylym mınıstrligi jazǵy mektepke barýǵa keńes beredi. Alaıda mindettemeıdi. Sol sebepti kanıkýldaǵy qosymsha bilimnen qalys qalatyndar da bar bolar. Desek te, óz erkimen qýana qatysyp júrgender de jeterlik.
Negizi elimizdegi barlyq memlekettik orta bilim berý uıymynda jazǵy mektepter aqysyz oqytady. Al M.О́temisuly atyndaǵy oqýshylar saraıy oqýshylarǵa arnap aqyly shyǵarmashylyq jazǵy mektep uıymdastyrdy. Biraq oǵan tegin baratyn balalar da bar. Atalǵan oqýshylar saraıy dırektorynyń oqý isi jónindegi orynbasary Aıymkúl Jabaeva aqyly mektepte aqysyz oqyp júrgen 70 bala bar ekenin jetkizdi.
«Osy jyly jazǵy mektepti uıymdastyrýda úsh aýysym josparlanyp otyr. Birinshi aýysym 30 mamyr men 10 maýsym, ekinshi aýysym 13-24 maýsym aralyǵynda, al úshinshi aýysym 27 maýsym men 8 shilde aralyǵynda bolady. Birinshi aýysymǵa 160-qa jýyq bala tirkeldi. Onyń ishinde kópbalaly, áleýmettik jaǵynan az qamtylǵan otbasydan jáne balalar úıinen kelgen 70 oqýshy bar. Bul balalardyń oqýyn «Aqnıet» qoǵamdyq qory tólep berdi. Atalǵan úsh sanatqa jatpaıtyn oqýshylardy ata-analary ózderi aqyly oqytady. 10 kúndik oqý aqysy 20 myń teńge turady. Jazǵy mektebimizge 6-10 jas aralyǵyndaǵy balalardy qabyldaımyz», dep túsindirdi A.Jabaeva.
Oqýshylar saraıy ókiliniń aıtýynsha, shyǵarmashylyq baǵyttaǵy jazǵy mektepte saǵat 9.00-13.00 aralyǵynda úsh sabaq ótedi. Sabaq shahmat, sýret salý, horeografııa, vokal, basseınde júzý, aǵylshyn, robottehnıka, qolóner, plastılınmen jumys isteý syndy qyzyqty úıirmeler tártibinde ótedi. Jazylǵan balanyń bári jas shamasyna qaraı toptarǵa bólinedi. 15-16 oqýshydan turatyn ár top oqý uzaqtyǵy 10 kúnge sozylatyn mektepte bekitilgen sabaq kestesi boıynsha osy úıirmelerge qatysady.
Ata-anaǵa da, balaǵa da tıimdi
«Úıirme sabaqtarynan basqa sport zalynda jarystar ótedi. Jeńimpazdarǵa yntalandyrý esebinde dıplomdar beremiz. Oqýshylar saraıy alańynda ártúrli oıyndar, kvester ótkiziledi. Máselen, alǵashqy sabaq kúninde sahnada Hárrı Potter týraly qoıylymdy tamashalady. Bul balalardy erekshe qyzyqtyrdy. Biz jazǵy mektepti bıyl segizinshi jyl qatarynan uıymdastyryp otyrmyz. Ata-analar tarapynan jaǵymdy pikirler estımiz. Birneshe jyl qatarynan kelip júrgen balalar bar. Birinshi aýysymǵa jazylǵan oqýshylardyń 40-50%-y kelesi aýysymǵa da jazylady. Keıde ata-analar balalaryn birneshe úıirmege qatarynan berip sharshatady, al bizdiń úıirme balanyń qyzyǵýshylyǵy qandaı baǵytta ekenin anyqtap, ata-anaǵa naqty qaı úıirmege beretinin bilýge kómektesedi. Muny biz praktıkadan kórip otyrmyz. Aıtalyq, jazǵy mektepke kelgen balalardy qyrkúıek aıynda taǵy kelip, naqty bir úıirmege jazdyryp jatady», dedi oqýshylar saraıynyń ókili.
Rasymen, jazǵy mektepter oqýshylarǵa ǵana emes, olardyń ata-analaryna da bala tárbıesinde durys sheshim shyǵarýǵa kómektesedi. Joǵarydaǵy tájirıbeden túıgen tujyrym osyǵan dálel bolatyndaı.
Kókshetaý qalasyndaǵy №16 orta mekteptiń 10 synybyn bitirgen Aqbópe Amantaıdyń anasy Gúlnar Nurpeısova onlaın oqytý formatynan keıin qyzynyń oqý deńgeıi burynǵydan salystyrmaly túrde tómendegenin aıtady.
«Qyzym gýmanıtarlyq pánderdi jaqsy túsinedi, tek jaratylystaný-matematıkalyq baǵyttaǵy pánder oǵan qıyndyq týǵyzady. Sol úshin de biz jazǵy mektepte bilim alýdy jón kórdik. Jazǵy mektep ár oqýshynyń óz qalaýy bolǵandyqtan, qyzym da óz oı-órisin keńeıtip, bilimin tereńdetý maqsatynda óz erkimen jaz aıynda oqýǵa sheshim qabyldady. Men ony qoldap otyrmyn. Sebebi pandemııa kezinde keı sabaqtardy onlaın oqydy. Sodan oqý deńgeıi burynǵydan salystyrmaly túrde tómendedi. Jazǵy mektep osy olqylyqtyń ornyn toltyrady dep senemiz», dedi G.Nurpeısova.
Aıdana ShOTBAIQYZY,
«Egemen Qazaqstan»,
Arýjan NAǴAShBAI,
L.N.Gýmılev atyndaǵy Eýrazııa ulttyq ýnıversıtetiniń stýdenti