«Ańsaǵan sábı» baǵdarlamasynyń arqasynda 1307 otbasynda kópten kútken 1560 bala dúnıege keldi. Bul týraly Densaýlyq saqtaý mınıstri Ajar Ǵınııat aıtty, dep habarlaıdy Egemen.kz.
«Prezıdentimiz Qasym-Jomart Kemeluly bedeýlik saldarynan otbasylyq juptardyń 20 paıyzyy ajyrasyp jatqanyna, otbasylyq-demografııalyq jaǵdaıǵa alańdaýshylyq bildire otyryp, «Ańsaǵan sábı» arnaıy baǵdarlamasyn júzege asyrýdy tapsyrdy. Byltyr osy baǵdarlama arqyly 7 000 áıelge qosalqy reprodýktıvtik tehnologııalar qoljetimdi boldy. Nátıjesinde 3 000-nan astam áıel júktilik boıynsha esepke alyndy. 1307 otbasynda kópten kútken 1560 bala dúnıege keldi. Bul baǵdarlama «Deni saý ult» ulttyq jobasy sheńberinde 2025 jylǵa deıin jalǵasady», dedi Ajar Ǵınııat Úkimet otyrysynda.