Qazaqstandyq oqýshylar alǵash ret Dúnıejúzilik gımnazıada-2022 dodasyna qatysyp, jaqsy nátıje kórsetti. Bilim jáne ǵylym mınıstrligi jarys jeńimpazdaryna bilim granttaryn tabystady. Endi olar ózderi tańdaǵan joǵary oqý ornyna Ulttyq biryńǵaı testileý synaǵyn tapsyrmaı-aq túsedi.
Bıylǵy Dúnıejúzilik gımnazıadada oqýshylarymyz Fransııanyń Normandııa qalasynda álemniń 70-ten asa elinen kelgen jasóspirimdermen básekelesti. Qazaqstan quramasynda 234 sportshy óner kórsetti. Olar basketbol, boks, erkin kúres, áıelder kúresi, grek-rım kúresi, dzıýdo, jeńil atletıka, ústel tennısi, júzý jáne basqa da sporttyń 18 túrinen synǵa tústi.
Álemdik arenada top jarǵandarǵa Bilim jáne ǵylym mınıstri Ashat Aımaǵambetov baǵaly syılyqtar berip, 50 jeńimpazǵa bilim granty taǵaıyndalatynyn aıtty.
«Men barshańyzdy tarıhı jeńisterińizben quttyqtaımyn! Sondaı-aq oqýshylarymyzdyń jattyqtyrýshylary men ata-analaryna álemdik arenada osyndaı joǵary jetistikterge jetýde qoldaý kórsetkeni úshin alǵys aıtqym keledi. Prezıdent Qasym-Jomart Toqaevtyń Qazaqstan halqyna Joldaýynda bergen tapsyrmasy boıynsha zańnamaǵa ózgerister engizildi. Budan bylaı bedeldi halyqaralyq pándik olımpıadalardyń, sporttyq jarystardyń jáne álemdik deńgeıdegi shyǵarmashylyq baıqaýlardyń jeńimpazdary men júldegerleri UBT tapsyrmaı-aq JOO-ǵa beıindi baǵyttar boıynsha grantqa túsýge múmkindik aldy. Kúni keshe buıryqqa qol qoıyldy jáne endi gımnazıadanyń 50 jeńimpazy, ıaǵnı mektepti bıyl bitirip otyrǵan túlekter óz mamandyǵy boıynsha joǵary oqý oryndarynda bilim alý úshin grantqa ıe bolady», dedi saltanatty jıynda sóz alǵan vedomstvo basshysy.
Mınıstrlik jeńimpazdar men júldegerlerdi bilim granttarynan bólek uıaly telefondar, smart-saǵattar, noýtbýkter, paýer-bankter sekildi baǵaly syılyqtarmen, al úzdikterdiń ustazdary men jattyqtyrýshylaryn Alǵyshattarmen marapattady.