Jergilikti jastar qaýymdastyqtaryna, bilim berý salasyna qoldaý kórsetý maqsatynda Almaty oblysy Uzynaǵash aýylyndaǵy Seıdahmet Berdiqulov atyndaǵy mektep ujymy men «Komýnıtıplıýs» mádenı-áleýmettik, bilim berýdi damytý qorynyń birlesip atqarǵan jobasy nátıjeli aıaqtaldy.
«Komýnıtıplıýs» toby sońǵy 6 jylda qosymsha bilim berýdi damytý salasynda jumys isteı otyryp, balalar men eresekterge arnalǵan daǵdylardy damytýǵa, bos ýaqytty tıimdi ótkizýge arnalǵan oqý baǵdarlamalaryna atsalysyp keledi. Qoǵamdyq qor byltyr qazaq orta mektepteri muǵalimderiniń qaýymdastyǵyn qoldaýdy maqsat ete otyryp, Ustazdan Ustazga jobasyn bastaǵan bolatyn.
Qańtar oqıǵasynan keıin elimizdiń azamattyq sektorynyń belsendi bóligi aýyl men qala arasyndaǵy áleýmettik máselelerge erekshe kóńil bóle bastady. Ásirese aýyl jastarynyń bilimge tolyq qoljetimdiligi men áleýmettik múmkindikteriniń tómendigine alańdaýshylyq bildirip, eriktiler men túrli sala mamandary pro bono jobasyna, óńirlik jobalarǵa qoldaý bildire bastady. Osy oraıda pedagogter qoǵamdastyǵy men mektep oqýshylaryn qoldaýdyń zamanaýı tájirıbesi retinde nátıjesin bergen «Komýnıtıplıýs» keısin sarapshylar ulttyq baǵdarlamanyń bir bóligi retinde elimizdiń basqa da óńirlerinde júzege asyrý múmkindigi zor degen toqtamǵa keldi.
Joba qatysýshylarynyń dereginshe, Seıdahmet Berdiqulov atyndaǵy mektepte 2 500 oqýshy bilim alyp, 200-deı pedagog eńbek etedi. Atalǵan joba byltyr mamyr aıynda mekteptiń belsendi ustazdarynyń bastamasymen qolǵa alynǵan. Eriktilerdiń kómegimen mektep janyndaǵy qosalqy ǵımarat mektep merekeleri, trenıngter, balalardyń beıresmı kezdesýleri ótetin mádenıet úıine aınalyp, bir jyl ishinde «Komýnıtıplıýs» qorynyń qoldaýymen qarjylyq saýattylyq, kásipkerlik, jasandy ıntellekt negizderi, toptyq jumys, jobalyq belsendilik, til tabysý daǵdylaryn damytý boıynsha 20-dan astam joba boıynsha onlaın jáne oflaın trenıngter ótti. Mysaly, ótken jyldyń qarasha aıynda Qazaq bas sáýlet-qurylys akademııasynyń dızaın kafedrasynyń oqytýshylary men stýdentteri jáne Optimus.kz kompanııasynyń qoldaý kórsetýimen 49 synyptyń oqýshylary «#49aǵash» mýralyn salyp, shyǵarmashylyq jumys komıýnıtı-ortalyq qabyrǵasynyń sánine aınaldy. Osy oraıda áleýmettik kitaphana jumysynyń utymdy uıymdastyrylǵanyn da aıta ketken jón. Al jyl basynda kommýnıkasııa sarapshysy Latına Satarova mektep muǵalimderi men joǵary synyp oqýshylary úshin kommýnıkatıvti daǵdylardy damytý boıynsha birqatar trenıng ótkizse, naýryzda belgili PR-maman, kásiptik keńesshi Darıa Býblıktiń bastamasymen aýyl mektepterindegi balalardyń ózin ózi tanýdy zertteý jobasy iske qosyldy. Elimizde bilim berýdi damytýǵa yntaly top pen mektep oqýshylary, qoǵamdyq jumystarǵa birikken táýelsiz qazaqstandyq kásiptik baǵdar berý qyzmetkerleri joba aıasynda óz bolashaǵyna beıqam, qoǵamdyq ómirden alshaq balalardyń bar ekenin anyqtady. Sarapshylar mundaı balalarmen jeńil oıyn formatynda jumystar júrgizip, óz ortasymen til tabysý, ujymǵa kirigý daǵdylaryna baýlydy. Sonymen birge qordyń áleýmettik jobasyna «Bılaın Qazaqstan» kompanııasy qoldaý bildirip, S.Berdiqulov atyndaǵy mektepte joǵary jyldamdyqty ınternetti bir jylǵa tegin paıdalanýǵa berildi.
«Komýnıtıplıýs» qorynyń negizin qalaýshy El Karmanova jobanyń qoǵamǵa qajet ekenin alǵa tartyp, aýyl men qala arasyndaǵy kommýnıkasııa ispetti ekenin atap ótti. Onyń aıtýynsha, qoǵamdyq ortalyqtarda aýyl jastary ózderin damytýǵa, qandaı da bir ıgi iste óz úlesi bar ekenin sezinýge múmkindik alady. Jastar úshin jasalǵan qolaıly orta qaýipsizdiktiń kúsheıýine yqpal etedi. Joba jyldam júzege asa qoımaǵanymen, 2-3 jyl ishinde nátıjesin beretini sózsiz. «Jobany jalǵastyrýǵa bel býa otyryp, Almaty oblysynyń mektepterinen ótinishter jınap, arnaıy baza qurýdy josparlap otyrmyz. Sodan keıin baryp mektepterge kómekteskisi keletin mamandar men sarapshylarmen bólisemiz. Tájirıbe kórsetkendeı, qala belsendileriniń aýylǵa kómegimiz qajet emes dep júrgen pikiri negizsiz», dep atap ótti E.Karmanova. Osy oraıda Darıa Býblıktiń aıtýynsha, áleýmettik máselelerdi sheshý únemi qarajatqa tirele bermeıdi. Eń bastysy, maqsaty bir qamqorshy azamattardyń belsendiligi qajet. Kásiptik baǵdar berý jobasynyń nátıjesinde 400-den astam mektep oqýshysy edunavigator.kz baǵdar berý testileýinen jáne mamandardyń jeke keńesinen ótýge múmkindik alǵan. Al mektep dırektorynyń tárbıe isi jónindegi orynbasary Aınur Sadyqova atap ótkendeı, bul joba mektep ujymyna úlken serpin berdi. Bir jylda muǵalimder damýǵa kedergi bolyp kelgen jaıttardy anyqtap, jańa daǵdylardy ıgerýge múmkindik aldy. Mektep oqýshylarynyń qarjylyq saýattylyq pen kásipkerlik negizderin damytý kýrstaryna qatysýy ómirlik jolda kádege jaraıtyny anyq.
«Komýnıtıplıýs» QQ dırektory Meıirjan Qurmanov joba tarıhymen tanystyra kelip, aýyl mektebimen yntymaqtastyq jobasyna Amerıka almasý baǵdarlamalary túlekteriniń ulttyq qaýymdastyǵy men Qazaqstandaǵy AQSh dıplomatııalyq mıssııasy qoldaý kórsetkenin atap ótti. «Bólingen grant bizdiń ujymǵa aı saıyn Uzynaǵash aýylyna baryp, balalarǵa trenıngter men basqa da tárbıelik sharalar ótkizýge múmkindik berdi. Endi joba óziniń turaqtylyǵyn dáleldeı otyryp, yntymaqtastyqty keńeıtý alańyna, Uzynaǵash aýylyndaǵy jastar qaýymynyń damýynda nátıjesin bergen ıgi jobaǵa aınaldy», dep atap ótti.
Joba qatysýshylary usynǵan derek boıynsha, aldaǵy oqý jylynda Uzynaǵash aýylyndaǵy jobany jalǵastyrý úshin 13 mln teńge shamasynda qarajat qajet. Sarapshylar ózderi betpe-bet kelgen kedergilerge toqtalyp, aýyl mektepterimen yntymaqtastyqta týyndaıtyn máselelerdiń standartty emes sheshimderin usynyp, keleshekte aýyldyq eldi mekenderdi damytý isine qoǵam ómirine beıjaı qaramaıtyn azamattardy shaqyrady.
ALMATY