Kartınadaǵy mahabbat

Bul sýret keshegi 90-jyl­darda oqyǵan oqý­shylarǵa tanys bolýy múm­kin. Nege deseńiz, kish­­kentaı qyzdyń ja­ry­ǵy mol ból­mede tań­ǵy jattyǵý jasap jat­qan beınesi mektep oqý­lyq­tarynda jıi kez­de­setin. Balalarǵa jy­lý­lyq syılaıtyn kartına sýretshilerdiń ádettegi bir eń­begindeı qarapaıym kórinedi. Alaıda týyn­dy­nyń salyný tarıhyna zer salsaq, beı­málim adamdar men taǵdyrlarǵa jo­lyǵasyń.

Kartınadaǵy qyzdyń prototıpi – Le­na. Anasy Tatıana Iаblonskaıa – ýkraın­­dyq sýretshi. Qy­zyna qarap otyryp, osy sýretti 1954 jyly Kıev­tegi úıin­de salǵan. Ol kezde Lena 13 jasta bola­tyn.

«Tań» kartınasynda Kıevtiń bir páteri sýret­teledi. Úı ishi jap-ja­ryq, boıaýy túrli-tústi bolǵanymen, shyn má­nin­de Lena otbasymen óte kedeı turǵan eken. Ol ápkesi ekeýi synyptastaryn úıine shaqyrýǵa da uıalatyn desedi. Kar­tınanyń sátti shyqqany sonshalyq, ataǵy birden aspandaı jóneledi. Tipti KSRO-daǵy árbir ekinshi úı osy kartınany qa­byr­ǵasyna ilip qoıatyn bol­ǵan. Alaıda sýrettiń ataǵy avtorǵa tabys ákel­megen.

Al Lena áıgili kartı­nanyń avtory Iаblon­skaıa­nyń qyzy ekenin esh­kimge aıtpaǵan. Ol maq­tanýdy unatpaıtyn, eleýsiz ómir súrgendi una­tatyn uıań qyz bolyp ós­ken desedi.

Dál osy tusta Alma­tyda turatyn 14 jastaǵy Arsen Beısembınov te atalǵan kartınany tó­se­giniń basyna ilip qo­ıyp, oǵan qarap túrli qııal­ǵa beriletin. «Bul qyz ómirde bar ma, esimi kim, qazir ne istep jatyr eken...» Arsen osylaı sýret­tegi keıipker qyzdy ishteı unata bastaıdy. Aı­ta keteıik, onyń ózi de sýret salǵandy jaqsy kórgen.

Mektep bitirgen soń ol Máskeý jo­ǵary kór­kem-ındýstrıaldy kol­ledjine oqýǵa tapsyrady. Taǵdyr degen osy shyǵar, dál sol ýaqytta Lena da mek­tep bitirip, Kıevten Stroganovqa keledi.

Arsen mektepti altyn medalmen bitir­gendikten sýretshiler oqýyna qınal­maı túsedi. Al Lena emtıhandardan áreń ótip, stýdent atanady. Osylaısha, Lena men Arsen birden dos­tasyp, dostyqtyń sońy mahabbatqa ulasady.

Arsen ózi jaqsy kór­gen kartınadaǵy qyzdyń Lena ekenin bilmeıdi. Degenmen ony kórgende eski tanysyn kórgendeı ala­bóten jylylyq sezi­netin. Keıin Arsen Lena­ny Almaty­daǵy úıine alyp kelgende qabyrǵada «Tań» kartınasy áli ili­nip turǵan edi. Mine, bar aqıqat osy tusta ashylady. «Sen bilesiń be, kar­tınadaǵy qyz – men».

Kartınadaǵy keıipker men kórermendi taǵdyr qosyp, ekeýi shańyraq kó­te­rip, Lena Qazaqstanǵa kelgen. Zańǵar atty uly qazir AQSh-ta turady.

Al Arsen 2000 jyly aýyryp qaıtys boldy. Qonys aýdarǵanda kar­tınanyń sol bir kóshir­mesi joǵalyp ketken, biraq Lena óziniń ózge portretin kózi­niń qarashyǵyndaı saqtaǵan. Ony Arsen ta­nysqannan kóp ýaqyt ótpeı, qaryn­dashpen salyp bergen bolatyn. Sýrettiń ekinshi betinde «Men seni súıemin, bul sýretti joǵaltpa» degen jazý bar.