Bul kúnderi Ázerbaıjannyń astanasy Bakýde nysana kózdeýden Álem kýbogy jarysy ótip jatyr. Baıraqty dodada álemniń 65 elinen kelgen 700-den asa mergen sportshy óner kórsetýde. Qazaqstan quramasy sapynan barǵan 40 sportshy júlde «atyp alýǵa» nıetti.
Sportty damytý dıreksııasynyń málimeti boıynsha, jarystyń alǵashqy kúninde 10 metrden pnevmatıkalyq myltyqpen nysana kózdeý syny ótti. Irikteý kezeńinde qazaqstandyq Islam Ýseınov ekinshi orynǵa taban tirep, fınalǵa joldama aldy. Al bas júlde úshin ótken saıysta otandasymyz 260,5 upaı jınap, álem kýbogynyń qola júldegeri atandy. Bul synda horvatııalyq Mıran Marıchıch top jarsa (261.8), serbııalyq Lazar Kovachevıch (260.9) kúmis medalǵa ıe boldy.
Al áıelder arasyndaǵy jarysta polshalyq Klaýdııa Bres jeńiske jetse, fransýz Kamılle Edrjeevskı kúmis, bolgarııalyq Antoaneta Kostadınova qola júlde aldy.