Almatydaǵy Q.Sátbaev atyndaǵy Qazaq ulttyq tehnıkalyq zertteý ýnıversıtetinde Parlament Senatynyń depýtattary Baqytjan Jumaǵulov pen Dınar Nóketaeva bir top qoǵam belsendilerimen, stýdenttermen suhbattasty.
Kezdesýdiń ózegi – jalpy Respýblıkalyq referendýmdy ótkizý, jastarǵa memleket úshin mańyzdy kúnniń mánin túsindirý. Bolashaq mamandar elimizde júrip jatqan saıası úderisterge múddeli ekendigin kórsetip, kókeılerinde suraqtaryn qoıyp, kózqarastaryn bildirip otyrdy.
Kezdesýde alǵash bolyp sóz alǵan senator Dınar Nóketaeva jınalǵandarǵa aldaǵy ótetin elimiz úshin asa mańyzdy qadam dep baǵalanǵan jalpy halyqtyq Referendým týraly jan-jaqty málimet berip ótti.
«Jalpy Konstıtýsııaǵa naqty qandaı ózgeris engizemiz degen másele aldyn ala Prezıdent tapsyrmasymen saralandy. Sonyń nátıjesinde Ata Zańymyzǵa osy referendýmda óte úlken tarıhı mańyzy zor ózgerister engiziletin bolyp otyr. Máselen, qazirgi Konstıtýsııadaǵy 99 baptyń 33-ine 56 ózgeris engizilmek. Sondyqtan da muny búkil halyqtyq referendýmǵa shyǵarý kerek degen usynysty Memleket basshysy Qazaqstan halqy Assambleıasynyń HHHI sessııasynda málimdedi», dedi senator D.Nóketaeva.
Ol sonymen qatar barlyq ózgerister Qazaqstannyń bolashaǵy úshin barynsha mańyzdy ekenin aıta kele, eń negizgi degenderine jeke toqtalyp ótti.
«Prezıdent Joldaýynda burynǵy sýperprezıdenttik júıeden yqpaldy Parlament júıesine kóshýdi zańdastyrýdy, sonymen qatar bılik tarmaqtarynyń ókilettikterin qaıta qaraýdy usyndy. Halyq endi jergilikti ákimderdi saılaý arqyly ózderi tańdaıdy. Sonymen qatar osy kúnge deıin Parlament depýtattary túgeldeı derlik partııalyq tizimmen saılanǵan bolsa, endigi jerde olardyń 30 paıyzy mojarıtarlyq júıemen, ıaǵnı ózin ózi usyný arqyly daýys jınap saılanatyn bolyp otyr. Sáıkesinshe oblystyq, qalalyq máslıhat depýtattarynyń 50 paıyzy osy ádispen saılanady. Osynyń bári Qazaqstannyń jańasha damýyna jasalǵan nyq qadamdar», dedi Dınar Nóketaeva.
Senator Baqytjan Jumaǵulov ta aldaǵy tarıhı kúndi ádiletti, zań ústemdik quratyn Memleket qurýymyzdyń alǵysharty dep qabyldaýymyz kerek degen pikir aıtty.
«Prezıdent «Jańa Qazaqstan degenimiz – bul Ádiletti Qazaqstan» dep naqty aıtyp ketti. Ádilettilik bar jerde damý men órkendeý bar. Eń bastysy monopolııa bolmaýy kerek. Saıası partııalardyń ishinde shynaıy básekelestik bolýy qajet. Bizdi bir qýantarlyǵy aldaǵy referendýmnyń mańyzdylyǵyn ásirese jastar jaǵy jaqsy túsinip, qyzý qoldaý bildirip otyr. Olardyń barlyǵy ózderiniń bolashaǵyn Ádiletti Qazaqstanmen baılanystyrady. Oǵan búginde osy oqý ornyndaǵy jastarmen kezdesýde kezekti ret kózimiz jetti», dedi senator B.Jumaǵulov.
Eki saǵattan asa ýaqytqa sozylǵan jıyn barysynda jastar oqytýshylar men qala belsendileri depýtattardan aldaǵy saıası reformalarǵa qatysty saýaldaryna tushymdy jaýap aldy.
ALMATY